«Ата болгон сонун турбайбы, эрте эле үйлөнүп албай деп азыр өкүнүп жатам» деген Мирбек Атабеков жубайы, уулу тууралуу кеп козгогондо тим эле көздөрү жайнайт. Ырчы мырза жашоосундагы акыркы кубанычтарын айтып, көтөрүңкү маанайда маек курду.

– Кандайсың, Мирбек? Сени менен акыркы жолу эки жыл мурун, үйлөнүү тоюңда маек курган экенбиз. Андан бери ата болдуң, жашооңдогу кубанычтарың менен бөлүшүп кетпесең болбос...
– Жакшыбыз, рахмат. Ооба, чынында акыркы эки жылда жашоомдо көп жакшылыктар болду. Сүйүктүүмө баш коштум, андан кийин уулдуу болдук. Азыр көз тийбесин, бактылуу ата-энебиз. Жеке жашоо менен эле алышып жүрө бербей, чыгармачылыкты да унуткан жокпуз. Былтыр, эсиңиздерде болсо, сахнада жүргөнүмө 10 жыл болгонунун урматына отчёттук концерт бергенбиз. Ойлоп көрсөм, эл кыдырбаганыма 8 жыл болуптур. Ошондуктан быйылкы жылды гастроль жылы деп жарыялап, Нооруздан баштап Ош жергесин кезип, андан ары Аксы, Исфана, Алайга чейин концерт коюп келейин деп жатам.

– Ушуга чейин бир топ ыр жаздырып, клип тарттырдың. Арасынан эң кымбатка түшкөнү кайсы болду?
– Клиптердин арзанын да, кымбатын да тартып көрдүк. Кээде экөөнүн айырмасы деле жок болуп калат экен. Мисалы, Москвадан тарткан «Унута албайм» клибиме 5-6 миң доллар короду. Ал эми кийинки «Мөлмөлүм» андан 2 эсе арзан түшсө да көп каралды, элге жакшы алынды. Кээде оригиналдуу болсун деп жазган ырларың элге жакпай калышы мүмкүн. Негизи көпчүлүктүн көңүлүн табыш оңой эмес.

– Жеке жашоого келсек. Идеалдуу үй-бүлө сен үчүн кандай болушу керек?
– Идеалдуу үй-бүлө болуш үчүн ар бирибиз өз кызматыбызды мыкты аткарышыбыз керек. Эгер аял киши эркектин ишин аткарып баштаса туура эмес болуп калат. Же эркек киши ушакка берилип, аялдын ишине киришип баштаса, ал да жаман көрүнүш.

– Мээримдин сен өмүр бою чогуу жашагың келген кыз экенин качан сездиң?
– Адамда ички туюм болот, мен ошого ишенем. Мээримди биринчи жолу көргөндө эле «балким, ушул кыз кийин менин жубайым болуп калар» деген ой келген. Келинчегим кичинекей кезинен эле музыка чөйрөсүнө кызыгып, интервьюларды алып калчу, көп көрүшүп, жакшы сүйлөшүп жүрчүбүз. Бир жолу туулган күнүн өткөрүп жатканын угуп, гүл берип куттуктап кеткем. Ал 18 жаштан өткөндөн кийин «ушул менин жубайым болот» деп толук көзүм жетти.

– Чогуу жашап баштаганда бири-бириңердин биле элек мүнөзүңөр ачылгандыр...
– Албетте, кыз-жигит кезде бири-бирибизге жагыш үчүн көп нерсени жашырып, кызыксыз нерсе айтып жатса да көңүл үчүн «ии, сонун» деп койчубуз. Азыр болсо жакпаса жакпайт деп дароо эле айтып салабыз (күлүп).

– Келинчегиңдин Америкада көз жарышына ал жакта тейлөө жакшы болгону себеппи же башкабы?
– Келинчегимде мага турмушка чыга электе эле АКШнын грин-картасы бар болчу. Кош бойлуу кезинин акыркы күндөрүндө Мээрим ал жакта болгондуктан, ошол жакта төрөгөн ыңгайлуу болуп калды. Апам да ал жагдайды туура көрдү. Мен апамдын суранычын аткардым.

– Ата болгонго чейинки, андан кийинки Мирбекти мүнөздөп берсең. Баалуулуктар өзгөрдүбү?
– Кадимкидей өзгөрдү. Акыл баары бир бийлеп турат да. Балалуу болууга даяр болчумун, бирок жоопкерчилик күчтүү экенин билбептирмин. Азыр «эрте эле үйлөнүп алсам болмок, кап» деп калдым. Мына буюрса, 3 ай болду, бала деген аруу болот экен. Кээде жиним келгенде Адамды карасам баарын унута түшөм. Мурун бир тааныш «сен 25 жашка чыктың, 30га чейин убакыт бат эле өтүп кетет. 30дан кийин андан да бат өтөт. Андан кийин депрессия башталат» деп айтты эле. Менимче, адам бир нерседен тажаганда депрессияга кабылат. Балким, бойдок болуп жүрө берсем, бара-бара ал жашоодон тажап депрессияга түшмөкмүн. Үйлөндүм, жыл айланып уулдуу болдум. Мындай бакыт менен бир гана ырахаттанып жашаш керек.

– Уулуңардын аты да өзгөчө, Адам деп коюптурсуңар...
– Ооба, уулубуздун атын Адам деп чоң апасы койду. Буга чейин андай ысымды эч жерде уккан эмесмин. Адамзат үчүн кызмат кылсын, адам болсун деген тилекте койдук. Угушубузча, бизден кийин баласын Адам деп атагандар болуптур. Ушул жерден бир нерсени айта кетейинчи, азыр көпчүлүк чет өлкөлүк ысымдарды балдарына коюп башташпадыбы. Ошол нерсени мен туура көрбөйм. Албетте, ар кимдин ою бар деңизчи, ошондо деле кээде кыргыздын ысымдары ушинтип отуруп жок болуп кетеби деп ойлой берем.

Гүлжамал Бөрүкулова
Адилет Бектуров
star@super.kg