Кечки саат 9 атактуунун үйүнө конокко баруу үчүн анчалык ыңгайлуу убакыт эмес. Бирок ушул убакта гана үйдүн ээсин кармап калууга мүмкүн болду. Азыркы тапта Бүткүл дүйнөлүк көчмөндөр оюнуна балбандарды даярдап жаткан Кыргыз Республикасынын алыш күрөш боюнча машыктыруучусу, куудул Кабыл Бөрүбаев бизди Бишкектин Ала-Тоо конушунда жайгашкан ак өргөөсүндө тосуп алды.

ҮЙҮ ТУУРАЛУУ

• 1996-жылы времянканы 1200 долларга сатып алышып, кийин аны кеңейтишкен.
• Жер тилкесинин жалпы аянты 5 сотых.
• 2 кабаттуу: 1-кабатта 2 уктоочу, 1 конок тосуучу бөлмө, холл, ашкана жайгашкан. 2-кабатта 3 уктоочу бөлмөнүн дубалы тургузулган, быйыл алар толугу менен жасалгаланат.

– Кабыл мырза, көп жыл Ошто жашаганыңызды билебиз. Бишкекке кантип келип калдыңыздар?
Кабыл мырза: – Бул үйдү мен продюсер болуп иштеп жүргөн кезде сатып алдым. Анда 2 бөлмөлүү времянка эле болчу. Алгандан кийин карасак эптеп эле куруп койгондой көрүндү. Кийинки жылы бөлмөнү казып көрсөм алды баткак экен. Суук тартып ооруп калбайлы деп жанына дагы 2 бөлмөлүү времянка салып, көп жыл ошондо жашап жүрдүк. 2009-жылы үйдү кеңейтип 2 кабат кылып тургуздук. 2-кабаттагы бөлмөлөрдү быйыл чыгынып толугу менен бүтүрүүнү пландап жатам.

Тамара айым: – Биз Ошто жашап жүргөндө артисттер концерт коюп бири-бирине үй алып берүүнү колго алышкан эле. Негизи бул үйдү ыраматылык Манас Бердибеков алмак. Жубайына бул үй жакпай калып баш тартышкан. Кийинки кезек бизде болгондуктан бизге буюруп калды.

– Чыгармачыл адамдар конокко көп келишчү беле?
К.: – Биздин үй Оштон келген артисттердин аэропорту болчу. 2 бөлмөлүү времянкада жашасак да баарыбыз батчубуз. Кээде 20 чактыдай адам болуп кетет элек. Жүрөк кенен болсо баары бата берет экен да.

Динара Абдыкадырова
Адилет Бектуров
star@super.kg