Бойдоктор бурчу

Ырчы Нурлан Насип "Бойдоктор бурчу" рубрикасынын каарманы. Жыйырма жашка толуп турган бул жигиттин жары болууга кызыккан кыздар көп экенине шек жок.

"КАЛП АЙТПАШЫМ КЕРЕК"
– Азыр мен, орусча айтканда, "испытательный срок" деп коёт го, ошондомун. Жоопкерчиликтүү болуп, айтылган убакытта барчу жерге кечикпей барышым, калп айтпашым керек. Бул сыноо февралдын аягына чейин болот. Ушундай эрежелерди так аткарсам, ди-джей, продюсер Канат Кадыржан мени менен иштешүүгө макулдук берет. Азырынча кагаз жүзүндө келишим түзүү жөнүндө ойлоно элекпиз.
Учурда чыгармачылык менен алпурушкандан сырткары студентмин. Тактап айтканда, Мураталы Күрөңкеев атындагы музыкалык окуу жайын аяктоо алдында турам.

"НАСИП ДЕГЕН АТТЫ ЫРЫМ КЫЛДЫМ"
– Эл мени Нурлан Насип деп таанып калышпадыбы. Нурлан өзүмдүн атым, Насип деген атты чыгармачылыкта Кудай насип кылып чоң ийгиликтерге жетейин, сахнаны багындырайын деп ырым кылып койдум.

"ТАМАК ЖАСАГАНДАН РАХАТ АЛАМ"
– Негизи, бош убактым деле болбойт. Бош боло калсам эле ыр жазып, обон чыгарууга далалат кылам. Катуу чарчаганда жагымдуу музыканын ыргагында тамак жасап эс алам. Тамак жасоо аялдын иши болгондуктан, ашканага көп деле кирбейм. Ошентсе да картошка кууругандан рахат алам. Менин кууруган картошкамды жеген киши сөзсүз даамдуулугун айтат.

"СҮЙҮҮГӨ БОЛГОН КӨЗ КАРАШЫМ..."
– Сүйүү деп эки адамдын ортосундагы ысык мамилени эсептейм. Буга чейин балалык сүйүүлөр болгон. Мен сүйлөшкөн кыздардын саны чын эле эсимде жок. Анткени көп кыз менен сүйлөшкөм. Мектепке жаңы келген кыздардын баарын сүйүп чыктым окшойт. Азыр чыныгы сүйүү качан келет деп күтүп отурам. Мага, негизи, жөнөкөй, сулуу, акылдуу кыздар жагат. Ошентсе да, мен биринчи сулуулугуна карайм.

"ШАЙЫР ЖИГИТМИН"
– Жашоодо аябай шайырмын, ак көңүлмүн. Ак көңүлдүгүмдүн зыянын көп тартам. Өзүмдө жок болсо да, сурагандарга тааныштардан акча таап берип, кайра ала албай эле жүрө берем. Анан эч качан, эч кимге кек сактабайм.

Нурлан менен таанышкысы келген кыздар ырчынын Nyrlannasip@mail.ru дарегиндеги электрондук почтасына кат жазышса болот.

Сүйүн Кулматова
star@super.kg