КООМДО
Антикафе – ар кандай кызмат же тамактануу үчүн эмес, убакыт үчүн төлөнүүчү кафе же клуб. Анда ар бир мүнөт же саатына акча төлөнөт. Мындай жерлер кино көрүү, музыка угуу, белгилүү инсандар менен сүйлөшүү же жөн гана достор менен жолугушуу, бизнес-идеяларды талкуулоо жана башка ушул сыяктуу үчүн колдонулат. Антикафенин ичи ар түрдүүчө кооздолушу мүмкүн, бирок көбүнчө үйдөгүдөй жасалат. Алгачкы антикафенин автору ишкер Иван Митин 2011-жылы «Циферблат» аталышында Москвада ачкан. Учурда мындай мекемелер «бош жер», «тайм-кафе», «тайм-клуб» аталышта дүйнө жүзүнүн ар бурчунда күн сайын ачылууда.


ИНТЕРНЕТТЕ
Лендинг – колдонуучу жарнамалык шилтеменин негизинде кирүүчү веб-баракча. Мисалы, бир сайтка кирдиңиз дейли, анда илинип турган жарнамаларды бассаңыз туура эле лендинг баракчасына киресиз. Анда ар түрдүү жарнама камтыган маалымдамалар колдонуучуга түрдүү сунуштарды көрсөтөт. Бири сатып алуу, программаны көчүрүү десе, башкасы баракчага жазылуу жана башка ушул сыяктуу. Сайт бир же андан ашык лендинг баракчага ээ боло алат. Кээде сайт толугу менен лендингден да турушу мүмкүн.


ТЕХНИКАДА
Бустер – автоунаадагы жөлөнгүчү жок, балдарга ылайыкталган отургуч. Ал 5 жаштан 13 жашка чейинки 15-45 килограмм салмакка ылайыкташкан кичинекей жүргүнчүлөргө атайын жасалган. Бустерлер баланы өйдөрөөк көтөрүп, автомашинанын коопсуздук курун туура тагынууга жардам берет. Анын чыканак койгучу жана ансыз деле боло берет. Бустердин түбү эч нерсе менен бекилбейт же унаанын отургучуна атайын бекиткичтер (Isofix) менен жана кошумча курлар (Latch) менен бекитилиши мүмкүн.

Адилет Керимбеков
koom@super.kg