20-апрелде Жогорку Кеңештин экс-депутаты Урмат Аманбаевага каршы козголгон кылмыш иши Бишкек шаардык сотунда каралды. Шаардык сот экс-депутатты 9 жылга эркинен ажыратып, мүлкүн конфискациялоо боюнча Октябрь райондук соту чыгарган өкүмдү күчүндө калтырды. Урмат Аманбаевага Башкы прокуратура тарабынан "коррупция" беренесинин негизинде кылмыш иши ачылган. Экс-депутат Ош облусундагы Кургак учук менен күрөшүү борборунун башкы эсепчиси болуп турганда мыйзамсыз иштерди жасап, мамлекетке 17 миллион 263 миң 500 сом зыян келтирген деп айыпталган болчу.
Ушул эле күнү экс-башкы прокурор, учурдагы Жогорку Кеңештин депутаты Аида Салянованын күйөөсү Бакыт Абдыкапаровдун иши боюнча да Бишкек шаардык соту чечим чыгарды. Шаардык сот "алдамчылык" жана "кызмат абалынан кыянаттык менен пайдалануу" беренелери менен айыпталып жаткан Бакыт Абдыкапаровду шарттуу түрдө 7 жылга эркинен ажыратуу боюнча өкүм чыгарып, 50 эсептик көрсөткүчтөгү айып пул салынды. 7 жылдын 3 жылы сыноо мөөнөтү болуп эсептелинет, эгер соттолуучу аталган сыноо мөөнөтүнүн ичинде өзүн үлгүлүү алып жүрсө, жаза мөөнөтү кыскартылат. Эске салсак, Бакыт Абдыкапаров «мамлекетке зыян келтирген, көз боёмочулук кылган, кызмат абалынан кыянаттык менен пайдаланган» деп айыпталган. Биринчи Май райондук сотунун чечими менен Абдыкапаров 7 жылга шарттуу түрдө кесилген эле.