КҮНҮМДҮК ЖАШООДО
Папик – бул орус тилинен алынган, «папа» (ата) деген сөз. Бирок кыргыз коомчулугунда да кеңири колдонууга өтүп калды. Папик деп адатта жашы өтүп калган, бирок капчыктуу, өзүнөн кыйла жаш кыздарды керектүү материалдык байлык менен камсыз кылып жубайлыкка алган же экинчи, үчүнчү аялы катары алган эркектерди айтышат.
Албетте, бул боюнча ар кимдин ою ар кандай болушу мүмкүн. Аларды сындоо деле туура эмес. Бирок арабызда капчыктуу, жашы улуу эркекти торуна түшүрүп алып, курбуларына да «мага окшоп бир папик таап ал да» деп кеңеш берген кыз-келиндер бар. Ал кеңешке ынап папик издегендер да жок эмес.

ТРАНСПОРТТО
Рестайлинг– англис тилинен «restyling» – «жаңылоо» деген маанини берет. Башкача айтканда, унаанын ичин да, тышын да жаңыртуу. Бир эле унаанын жөнөкөй жана рестайлинг түрү болот. Себеби машина чыгаруучу ишкана бир үлгүдөгү унааны чыгарып, кийин аны сатуу азая баштаганда кардарларды кызыктыруу үчүн ошол үлгүдөгү унаага бир аз жаңычылдыкты кошот, тактап айтканда, рестайлинг жасайт.
Адатта машина сатуу боюнча жарнамаларда унаа рестайлинг экени көрсөтүлөт. Бул унаанын айрым бир өзгөчөлүктөрү, жаңычылдыктары бар дегенди түшүндүрөт.

КОСМЕТОЛОГИЯДА
Фейсбилдинг – косметологиядагы жаңы сөздөрдүн бири. Англис тилиндеги «face» (бет) жана «building» (куруу) сөздөрүнөн келип чыккан. Бул беттеги булчуңдарды чыңдоо үчүн жасалуучу атайын көнүгүүлөр. Фейсбилдингди эрежеси менен жасоо аркылуу анча-мынча бырыштардан, экинчи ээктен кутулууга болот.
Адатта беттеги бырыштарды кетирүү үчүн көпчүлүк хирургиялык жолдорго барат эмеспи, же болбосо ботокс сайдырышат. Ал эми фейсбилдинг жасоо менен сиз табигый сулуулукка жасалма каражаттарды аралаштыруудан алыс болосуз. Албетте, бул сонун альтернатива болуп берет. Анан калса зыяны да жок.

Мирлан Өмүралиев
koom@super.kg