"Кара каш”, "Мама"деген чыгармалары менен популярдуу болгон Айя Садырова турмушка чыгып, балалуу болгондон кийин сахнадан алыстап кеткен эле. Кайрадан чыгармачылыгы жанданып, жаңы ырларды жаздырып баштаган ырчы айым менен чакан маек курдук.

– Айя, көптөн бери сизди сахнадан көрбөй келебиз. Эмне менен алектенип жатасыз?
– Учурда "K Muz"телеканалында, "Замана"программасында телеалпаруучу болуп иштеп жатам. Чыгармачылыгым жанданып, кайрадан ыр жаздырууга кириштим. Кыргыз тилиндеги ырымда Баястан рэп айтса, орус тилдүү ырымдын кайырмасы түрк тилинде ырдалат. Аны Хасан Хамдиев деген мырза менен ырдайм. Эми ошол ырларга клип тартып баштайбыз. Мурда маданий иш-чараларга калыс болуп калганда "мен эми ырдабай калдым"деп айтчумун. Чынында, кайсы бир убакта "болду, ырдабайм"деп чечкем. Эгер маңдайыңа ырчылык жазылса, андан качып кутула албайт экенсиң. Ошондуктан кайра сахнага тартыла баштадым.

– Чыгармачылыгыңыз эмне себептен токтоп калды эле?
– Турмушка чыктым, балалуу болдум. Жолдошум аябай кызганчаак болчу. Башка ырчы мырза менен дуэт ырдап койсом да жактырбайт эле. Ошондуктан үй-бүлөнү биринчи орунга коюп, чыгармачылыгым токтоп калган. Жыйынтыгында кызганчаак күйөө мен үчүн эмес экенин түшүндүм. Ортобузда балабыз бар, биз жакшы дос бойдон калдык. Ажырашып кеткенибизге көп болду, канча убак болгонун так айта албайм. Анткени мен андан кетип калчумун, артыман келип кайра алып кетчү. Мындай нерсе көпкө созулду. Бул жашоо экен да. Ортодогу алыстык да себеп болду окшойт. Ал чет өлкөдө жашагандыктан мени да алып кеткиси келди, бул жакта такыр жашагысы келген жок. Мен болсо "бул менин мекеним"деп Кыргызстанды тандадым. Азыр баарынан эс алып жатам. Эч ким менин тынчымды албайт, эч ким "муну кийбе, минтип боёнбо, кыска кийбе"дебейт (күлүп). Студенттик кездегидей өзүм каалаганды кылып жатам.

– Уулуңуз чоңоюп калдыбы?
– Ооба, 6 жашка чыкты. Быйыл мектепке барат. Азыр менин жашоомдун маңызы – баламды татыктуу тарбиялоо.

– Маегиңизге рахмат.

Динара Абдыкадырова
star@super.kg