28-май күнү Милан шаарынын "Сан-Сиро" стадионунда УЕФА Чемпиондор Лигасынын финалы орун алды. Зинедин Зидан машыктырган "Реал" Диего Симеоненин "Атлетикосуна" каршы. "Падышалыктардын" "карапайымдар" менен болгон тиреши.

2 жыл мурун ызалуу жеңилүүгө дуушар болгон "индейлер" реванш алууга даяр эле, ал эми Роналду жана анын командасы утулуу деген сөздү уккулары келген жок.
Оюндун алгачкы бөлүгү "актардын" үстөмдүгүндө өттү. 17-мүнөттө команданын капитаны Серхио Рамос стандарттык абалдан гол киргизип, эсепти ачты. Тыныгуудан кийин Гризманн пенальтиден жаза басканы менен, Карраско 79-мүнөттө эсеп санын теңеди. Эки команда тең бул жыйынтыкка макул болушкандай, оюндун негизги мүнөтү жана кошумча 15 мүнөттүк экстра-таймында гол кирген жок. Жеңүүчү пенальти сериясында аныкталмай болду.
Кыл чайнашкан кармаштын ток этер жери – дарбазачы жана сокку узатуучунун ортосундагы беттеш болду. Анда "Атлетиконун" коргоочусу Хуанфран жаза басса, Роналду Ян Облакка эч мүмкүнчүлүк берген жок. Канчалык "Атлетико" быйылкы жылы жеңишке татыктуу болбосун, "Реал" өз тарыхында 11-ирет Чемпиондор Лигасында жеңишти илип кетишти.

>

Адилет Керимбек уулу
sport@super.kg