Кыргызстандын Каржы министрлиги 4 айга футбол аянтчасын ижарага алуу боюнча тендер жарыялады. Жарыя мамлекеттик сатып алуулар сайтына 7-июнь күнү илинди. Бул үчүн министрлик салык төлөөчүлөрдүн эсебинен 50 миң сом коротмокчу.
Бул аталган министрликтин биринчи жоругу эмес. Буга чейин да Мамлекеттик сатып алуулар сайтына жарыяланган Каржы министрлигинин тендери коомчулукта кыжырдануу жараткан. Министрлик бассейнге сүзүүгө элдин эсебинен 230 миң сом коротмокчу болгон, башкача айтканда, жыл аягына чейин 15 чиновник 113 ирет бассейнге барып сууда сүзмөкчү болгон.
Каатчылыктан эл кыйналып турган маалда мамлекеттик каржыны бөлүштүрүүчү министрликтин мындай жоругу коомчулуктун катуу сынына кабылып, министр "мындай тендер жарыяланганын билбей калыпмын" деп актанып, жарыя сайттан алынып салынган. Мамлекетте каржы жетишсиздигинен толгон-токой маселелер чечилбей турган чакта эми бул министрлик элдин эсебинен футбол ойномокчу. Ушул эле учурда бөйрөк жетишсиздигинен улам бир өмүр гемодиализ аппаратына байланган жарандар улам митингге чыгып, бул аппараттарды көбөйтүп берүүнү суранып жүрүшөт. Каржы министрлигинин дени сак жашоо жүргүзүү далалаты жакшы көрүнүш. Бирок сууга сүзүүгөбү же футбол ойноогобу кызматкерлер өздөрүнүн эсебинен барышы керек.