Атай Өмүрзаков "Адем" тобу менен масштабдуу долбоорду ишке ашыруу үчүн колдоо сурап, коомчулукка кайрылды. Анда: "Былтыр ири дүйнөлүк продюсердик компаниядан сунуш алганбыз. Аларга өзүбүздүн идеяны сунуштасак жактырышты. Буюрса, биз жаңы технологиялар менен 3D форматында дүйнө кыдырып бий концертин уюштурсакпы деп жатабыз. Бул Кыргызстанды улуу, таланттарга бай, өнүккөн өлкө катары көрсөтүүгө жакшы мүмкүнчүлүк. Биз командабыз менен каражаттын басымдуу бөлүгүн өзүбүз көтөрөбүз. Шоуну талаптагыдай өткөрүш үчүн дагы каражат талап кылынууда. Андыктан инвесторлордон биздин долбоорду колдоп бериңиздер деп суранабыз. 1 жыл ичинде чыгаша толугу менен акталат",- деп билдирген.
Кыргызстанды бий жагынан дүйнөгө таанытып келе жаткан Атайдын бул кайрылуусун колдоп, көпчүлүк колдорунан келген жардамын аябай тургандыгын айтышууда. Алардын арасында блоггер Кайрат Бекмамбетов "Биз 6 миллион элбиз, көп түкүрсө көл болот. Эч кандай инвесторсуз эле ар кимибиз каражат чогултуп берсек бул долбоор ишке ашмак",- деп жазган. Ал эми ырчы Урмат Усенов "Бул биринчи иретте Тарых жана маданият жылынын урматына өкмөт алдында чоң мүмкүнчүлүк. Сапатсыз мааракелерге кеткен чыгымдардан кыскартып Атайга колдоо көрсөтсөк жыйынтык көбүрөөк болмок" деген пикирин калтырган.