– Мен сыртымдан карагандарга аябай бактылуу аялдай көрүнөм. Тааныштарым "сен бактылуусуң, жашооңор жакшы, жолдошуң чоң кызматтан түшпөй иштеп келет" дешет. Ооба, күйөөм Акаев, Бакиев, азыркы бийликтин тушунда да жакшы кызматтардан түшкөн жок. Акчаны жакшы табат. Эл суктангыдай эле заңгыраган үйүбүз, кымбат баалуу машиналардын түрү бар. Каалаганымды ичем, жейм, кийинем. Материалдык жактан жашообуз ойдогудай. Анан эмнеге нааразы болуп жатасың дебейсизби? Жан дүйнөмдүн жалгыздыгына, жардылыгына. Жолдошум баарын жөнгө салса да, менин көкүрөктөгү ушул көксөөмдү толтурган жок.
Экөөбүз студенттик кезде баш кошконбуз. Башында бири-бирибизге болгон мамилебиз ысык эле болчу. Мээримдүү, боорукер адамга туш болгонума кубанып жүрчүмүн. 2 балалуу болгондон тартып ал мээримин башка аялдарга да төгө баштады. Кызматтан жогорулаган сайын көңүлдөштөрүнүн саны арбып, улам жашыраагын тапканга көндү. Анын айынан канча ирет урушуп, ажыраштык. Төркүнүмө барсам же алар түшүнүшпөдү.
"Ой, баарын таап келип жаткандан кийин балдарыңды карап отура бер да. Сага дагы эмне керек?", "Кызматы бар, акчасы көп, бай күйөөнү кайдан табасың?", "Балдарың үчүн жаша..." Аларга акча, байлык болсо болду. Сенин эзилип, жанчылганың менен иштери жок. Далай ирет көз жашымды төктүм. Акыры балдарымды атасыз калтырбайын деп өзүмдү зордоп жашаганга түрттүм. Ошентип жүрүп 4 балалуу болдук. Азыр чоңдору турмуш куруп, куда-сөөк күтүп калдык. Элүүгө чыгып чоң ата, таята болду, токтолот дегем, анткен жок. Кайра күчтөнүп, кызынан жаш селкилер менен шапар тепкенин токтотподу. Жакында эле дачабызга кокусунан барып калып, жаш кыз менен кармап алдым. Ыза болгонумду айтпа. Жөн эле күйүп кеттим. Экөөнү тең тирүүлөй өрттөп салсам болмок. Анте албадым. Ачууланганымдан көзүмдөн жаш агып, сүйлөгөнгө да чамам келбей:
– Жаштык жериң калбады. Болду эми, жетишинче ойнодуң. Неберелериң чоңоюп жатат,- дедим болгону. Камырабай туруп:
– Бул кыздай боло албагандан кийин артымдан эмнеге аңдыйсың?! Сага эмне жетпей жатат?- деп ызырынып бетиме эки пачка долларды чачып, жаш кыз менен чыгып кетти.
Бул окуядан кийин көңүлүм мурдагыдан бетер сууду. Азыр өзүмдү караганга өттүм. Спорт менен машыгып, сулуулук салондоруна барып жүрөм. Жан дүйнөмдөгү боштукту толтуруп, жолдошума эрегишип башка бирөөнү таап алгым келет. Бирок ал нерсеге абийирим жол бербейт.

Чүрөк