"Салам, Нью-Йорк!" тасмасынын режиссёру Руслан Акун жана "Бир тууганчик" тасмасынын сценаристтери
Бакыт Осмонканов, Жеңиш Майрамбек уулу жакында жаңы үй-бүлөлүк комедия тартуу алдында турушат. Фильм достук, илимге умтулуу, туулган жерге болгон сүйүүнү чагылдырат. Тасманын продюсери Нурбек Айбашов жаңы эмгек тууралуу төмөнкүдөй маалыматтарга токтоло кетти: "Тасмада АКШга апасын издеп барган кичинекей Азаматтын окуялары баяндалат. Тартуу иштери Лос-Анжелес, Лас-Вегас, Бишкек жана Алматыда өтүп, Казакстан, Кыргызстан, Азербайжан, Татарстан, Тажикстандын чоң шаарларында көрсөтүлмөкчү. Буюрса, тасманы 2017-жылдын 1-январында прокатка чыгаруу пландарыбыз бар".
"Салам, Нью-Йорк!" тасмасы "2013-жылдын супер тасмасы" наамына татып, көп чет өлкөлүк сыйлыктарды багындырган эле. Андыктан мекендешибиз Руслан Акундун бул эмгеги да мурунку ийгилигин ашып өтүп, көп сыйлыктарга ээ болорунан күмөн жок.