Кыргыз Республикасынын Малайзиядагы элчилиги 2016-жылдын 1-июлунда малайзиялык алдыңкы жалпыга маалымдоо каражаттарынын өкүлдөрүнө ооз ачар уюштурду. Иш-чара элчиликтин кыргыз өлкөсүнүн туристтик потенциалын жогорулатуу боюнча аткарып жаткан иштеринин алкагында жасалды. Алдыда күтүлүп жаткан Кыргыз Республикасынын имиджин көтөрүүчү II Дүйнөлүк көчмөндөр оюндарын ар тараптуу чагылдыруу процессине чет элдик ЖМКларды тартуу максатын көздөйт. Жолугушууда кыргыз элинин бай тарыхы, маданияты менен каада-салты, кыргыз мамлекетинин туристтик потенциалы тууралуу кеңири маалымат берилди.
Элчиликтин маалыматына таянсак, коноктордун көңүлү өзгөчө 2016-жылдын 3-8-сентябрында Чолпон-Ата шаарында өтүүчү II Дүйнөлүк көчмөндөр оюндарынын философиясына жана ал тууралуу маалыматтарга бурулду. Кыргыз Республикасынын Малайзиядагы элчиси
Кылычбек Султанов II Дүйнөлүк көчмөндөр оюндарынын максаты – дүйнөдөгү көчмөн элдердин тарыхый жана маданий мурастарын кайра жаратуу жана сактоо, мындан тышкары көчмөндөр маданиятын даңазалоо экенин белгиледи.
Иш-чаранын катышуучулары II Дүйнөлүк көчмөндөр оюндарынын уникалдуулугуна суктанып, аларды чагылдырууга зор кызыгуу артышты. Жыйынтыгында Кыргыз Республикасынын этникалык оюндар боюнча долбоору –
II Дүйнөлүк көчмөндөр оюндарын чагылдыруу мүмкүнчүлүгү жөнүндө Малайзиянын алдыңкы ЖМКлары: "Бернама" жана ТВ-3 менен келишим түзүлгөнү белгилүү болду.