– Салам, Дайыр, күзүндө үйлөнөрүңдү уктук, жүрөгүңдү багынткан селки ким болду экен?
– Кандайсыздар? Сүйлөшкөн кызымдын аты Жанара, 22 жашта, Жалал-Абаддан болот. Бир көрүп жактыруудан улам ортобузда сезимдер пайда болду. Алгач жолукканыбызда ал мени тоготпогонсуп караган эле. Артынан чуркап жүрүп акыры жеттим. Жанаранын кылыктары, жасаган нерселеринин баары жагат. Табышмактуулугу, сырдуулугу менен мени багындырды. Оюмдагыдай кызды таптым, бойдокчулук менен коштошууга убакыт келди.

– Жакында эле ата-энең сүйүктүүңө сөйкө салып келишиптир...
– Ооба, 25-июль күнү ата-энем, туугандарым Жалал-Абадга барып Жанарага сөйкө салып келишти. Буюрса, заманбап тоюбуз сентябрь айынын аягында Ош шаарында өтөт. Ош шаарын тандаганыбыздын себеби, менин туугандарым да, анын туугандары да ошол жакка жакын экен. Ошондой эле Бишкекте Ошту көрө элек досторум көп, аларга көрсөтөйүн деп жатам.

– Көп жыл бойдок жүрүп, аны менен коштошууда бир аз ичиң ачышып жаткан жокпу?
– Жок, ал тууралуу такыр ойлогон жокмун. Мурун үйлөнбөй жүргөнүмдүн себеби, ажырашкандан абдан коркчумун. Анткени үйлөнүп, көп өтпөй эле ажырашкан түгөйлөрдү көргөм. Ошондуктан адамды бүт жагынан изилдөө үчүн мага убакыт керек болду. Өз бактымды таптым, аны менен бактылуу болорума көзүм жетти, мындан ары узартуунун кереги жок болуш керек.

star@super.kg