Өлкөбүздүн эгемендүүлүгүнүн 25 жылдыгына карата маданияттын өнүгүшүнө салымын кошкон белгилүү инсандарга көп жылдык үзүрлүү эмгеги үчүн мамлекеттик сыйлыктар берилди.
Алсак, III даражадагы «Манас» ордени Кыргыз Эл артисттери Саламат Садыкова, Назира Мамбетова жана Сардарбек Жумалиевге ыйгарылды. Мекенди алыска тааныткан "Город 312" тобунун солисти Светлана Назаренко жана бийчи Атай Өмүрзаков, көп ырчыларга устаттык кылып багын ачкан Рафаэль Сарлыков, актриса Шайыр Касымалиева Даңк медалына ээ болушту. Ал эми "Кыргыз Республикасынын Эл артисти" наамы төкмө акын Элмирбек Иманалиев, "Камбаркан" тобунун көркөм жетекчиси, дирижёр Рысбек Жумакуновго берилди. "Кыргыз Республикасынын Эмгек сиңирген артисти" наамына обончу Абидин Темиров, "Супер-Инфонун" тандоосу боюнча "Заманыбыздын супер тобу" аталган "Биз" тобунун солисти Бактияр Токторов, Гүлнара Тойгонбаева, Гүлзада Рыскулова жана "Супер-Инфонун" тандоосу боюнча "Заманыбыздын супер ырчысы" Мирбек Атабеков, төкмө акындар Аалы Туткучев, Жеңишбек Жумакадыр, Азамат Болгонбаев, Амантай Кутманалиев татышты. "Кыргыз Республикасынын маданиятына эмгек сиңирген ишмер" наамы "Азия Mix" КВН командасынын капитаны Эльдияр Кененсаров, режиссёр Темир Бирназаров жана башкаларга ыйгарылды.
Сыйлыгы тууралуу Бактияр Токторов: "Бул наамды алганга "Супер-Инфо" гезитинин да салымы чоң. Албетте, бул наамга татыганыма кубанып жатам, аябай жагымдуу болду. Күйөрмандар да "сиз мамлекеттик деңгээлдеги наамга татыктуусуз" деп калышчу. Ошондуктан бул сөздөр мага дем берип, сыйлыкты көптөн бери күтүп жүргөм",- деди.
Биз мамлекеттик сыйлыкка татыган атактуулардын айрымдарын гана белгилеп өттүк. Президенттин бул жарлыгы элге жарыяланары менен "калыс болбой калыптыр" деп сындап чыккандар көп болду.
Эске салсак, Маданият министрлигинен билдиргендей, кыргыз жеринде мамлекеттик сыйлыктарды тапшырууга 2012-жылы мораторий жарыяланып, быйыл гана алынып салынган.

star@super.kg