3-8-сентябрь аралыгында Ысык-Көл өрөөнү өзгөчө шаңга бөлөнүп, II Дүйнөлүк көчмөндөр оюну болуп өттү. Бул маараке кызыктарга бай болду. "Той болот, тойдун эртеси да болот" демекчи, экинчи ирет өткөрүлгөн көчмөндөр оюндары эмнелер менен эсте калганын, жетишкендиктерин жана кемчиликтерин тизмектеп өтөлү.

МАКТООГО ТАТЫГАН "МАШ БОТОЙ", БААТЫРДЫН ОБРАЗЫНДАГЫ СТИВЕН СИГАЛ

II Дүйнөлүк көчмөндөр оюндарынын ачылыш аземинде өлкөнүн 7 дубанынан тандалып алынган 1000 комузчунун Атай Огонбаевдин "Маш ботой" күүсүн черткени көрөрмандардын канын кызытып, көздөргө жаш тегеретти.
Ал эми оюндарга чакырылган коноктордун сап башында дүйнөгө таанымал америкалык актёр Стивен Сигал болду. Ал ачылыш аземинде көчмөн жоокеринин кийимин кийип, ат минип көрөрмандардын алдынан өттү. Мындан тышкары Москвадагы 17 адамдын өмүрүн алган өрт учурунда кыргыз жарандарын куткарууга жардамдашкан Юрий Лугвин да бул оюндарга кадырлуу конок катары чакырылды. Аны менен кошо кыргыз кыздарын өрттөн куткарган 5 кыргыз жигити көз жаздымда калды. Ошондой эле социалдык тармактардын биринде жүргүзүлгөн фотосынактын катышуучусу, "саз менеджери" аталган орусиялык окуучу Игорь Назаров да бул оюндарга чакырылып, көл жээгинде фотосессия уюштурду. Мындан соң интернет колдонуучулар аны "Ысык-Көл менеджери" деп атаганга да үлгүрүштү. Мааракенин жабылуу аземинде жергиликтүү ырчылардан тышкары Казакстан, Түркия, Франция, Азербайжан, Орусиядан келген 500гө чукул ырчы, бийчи, моделдер да өз өнөрлөрүн тартуулашты. Башында Түркмөнстандын өлкө башчысы Гурбангулы Бердымухамедов, Башкортостандын башчысы Рустем Хамитов жана "Газпромдун" жетекчиси Алексей Миллер келет деп күтүлүп жаткан. Алардын бири да келишкен жок.

БҮЙҮР КЫЗЫТКАН КӨК БӨРҮ

8-сентябрда Чолпон-Ата шаарында ат майданда өткөн көк бөрү боюнча финалдык беттеш эң бүйүр кызыткан оюндардын бири болду. Анда улакчыларыбыз Казакстан курамасы менен кез келип, 15:3 эсебинде утушту. Кыргыз спортчулары атаандаштарга эч кандай мүмкүнчүлүк бербей, аттарды жана өздөрүн оюнга толук бойдон арнашты. Жыйынтыгында улакчыларыбыз алгачкы 20 мүнөттүктө 7 улак, экинчи 20 мүнөттүктө 3 улак жана жыйынтыктоочу баскычта атаандаштарынын тай казанына 5 улак салышты.

ШАШЫЛЫШ БҮТКӨН ЖОЛДОР, УНАА ТЫГЫНЫ, МИЛЛИОНДОГОН ЧЫГАША ӨЗҮН АКТАЙБЫ?

Чолпон-Ата шаарына жетчү Балыкчы-Корумду жолун оңдоп-түзөө иштери шашылыш бүткөрүлдү. Бекем орнотууга бетон тартыш болгонбу, айтор, кээ бир жол белгилери жерде ташка жөлөнгөн абалда турду.
6-сентябрда Чолпон-Атадан Бишкектеги "Манас" аэропортуна учуп келген 280 комузчуну шаарга жеткирүү үчүн эч бир транспорт уюштурулбаганын, оюндардын ачылышынан кийин комузчулар эч кимге кереги жок болуп калганын "Айгине" маданий-изилдөө борбору социалдык тармактардан жазып чыкты. Аталган борбордун өкүлдөрү: "Чолпон-Атадан эки рейс келип "Манас" аэропортуна конгон. Биринчисинде 189 бала келсе, экинчисинде жүздөй бала келди. Биз үчүн бөлүнөт деген транспорт келген жок. Аэропортто 3-4 саатка жакын күттүк. Акырында өзүбүз 20дай кичиавтобус жалдап, балдарды шаарга жеткирдик",- деп билдиришти.
"Көчмөндөр оюндары Олимпиада оюндарынын уникалдуу аналогу" деп төш какканыбыз менен, бул оюндарды өткөрүүгө белсенген өлкө жок. Башында ар бир 2 жылда башка өлкөлөргө өткөрүп берилмей болгон Дүйнөлүк көчмөндөр оюну 2 жыл сайын Кыргызстанда өткөрүлө турган болду. Буга эмне себеп? Балким, миллиондорду чапчыган бул мааракенин пайдасына караганда чыгашасы көп чыгар. Novosti.kg сайтынын маалыматына таянсак, Президенттик аппараттын жетекчисинин орун басары Сапар Исаков экинчи ирет Дүйнөлүк көчмөндөр оюндарын өткөрүүгө жалпысынан 2 миллиард 4 миллион сом жумшалганын, бул биздин өлкөнүн иш-чараларды өткөрүүдө сарптаган рекорддук сумма экендигин айтты. Ал эми уюштуруучулар азырынча кеткен чыгым аягына чейин эсептелип бүтө электигин айтышууда. Корогон акчалар өзүн актайбы? Бул учурдун башкы суроосу.

Асхат Субанбеков
Алишер Алиев
star@super.kg