Ситора Фармонова – "Азия MIX" КВН командасынын оюнчусу, белгилүү өзбекстандык актриса, ырчы, модельер. Актриса социалдык тармакта анын атын колдонуп пайда көргөн фейк баракчадан жабыркаганын айтат. "Менин атымдан баракча ачып, жосунсуз жоруктарды жасап жүргөн фейк баракчанын кылыктарынан уялып жатам" дейт актриса.

СУЛУУЛАР СЫНАГЫНЫН ЖЕҢҮҮЧҮСҮ

Ситора Фармонова 1984-жылы 20-августта Өзбекстандын Бухара шаарында жарыкка келген. 1-класстан баштап мектепте түрдүү концерт, музыкалык сынактарга катышып, 11 жашында сулуулар сынагын утуп алган. 1997-жылы үй-бүлөсү менен Ташкент шаарына көчүп келишкен. 2000-жылы актрисалык карьерасын баштап, "Аялзаты" деген тасмада эпизоддук роль аткарып дебют жасаган. Шоу-бизнесте жүргөнүнө 17 жыл болгон Ситора бул жылдарда 29 тасмада роль аткарып, 30дан ашуун ыр жаздырып, 8 клип тартканга жетишкен. 2013-жылы кыргыздардын "Общага" телесериалына тартылып, 2015-жылы Эльдияр Кененсаров жана жубайынын чакыруусу менен "Азия МIX" командасына кошулган. Учурда модельерлик кесип менен кызуу алектенип жүргөн убагы. Каарманыбыз келечекте 5 баланын энеси болууну кыялданат.

– Ситора, саламатсызбы, социалдык тармактагы баракчаңызга фейк баракчанын курмандыгы болгонуңузду кабарладыңыз.Ал адамды таба алдыңызбы?
- Саламатсыздарбы? Ооба, менин атымдан ачылган фейк баракчанын жоруктарынан жабыр тартканым үчүн баарына коңгуроо кагып, ызы-чуу кылганга туура келди. Себеби ал адам акыркы күндөрү атын, фамилиясын меникиндей кылып өзгөртүп, кайсы сүрөттү жүктөсөм ошону дароо баракчасына жүктөп мени туурап калды. Кыжырдантканы – жигиттер менен жолугушууга макул болуп, кайрымдуулукка деп элден акча сураганы болду. Кала берсе менин атымдан интервью берип жүрүптүр. Өзүм эл көзүндөгү адам болгондуктан фейк баракчалардын пайда болушуна башында көз карашым түз эле болчу, анткени кумирине окшошкусу келип, сүрөттөрүмдү социалдык тармактарга жүктөгөн күйөрмандарымды көп эле байкачумун.
Менин атымдан фейк баракча ачкан адам Инстаграмда бар болчу, бирок аны өчүрттүргөм. Кийинчерээк ошол эле ат менен Фейсбукка катталып алыптыр. Акыркы күндөрү мага "Эмне мени өчүрүп салдың?", "Качан жолугалы?", "Мен акча даярдап койдум" деген таң калычтуу каттар келе баштады. Андан соң 1-2 кыргыз тилдүү гезиттерден маегимди окуп алып "шок" болуп калдым. Анткени эч бир басылмага интервью берген эмес элем. Өзүм кыргыз тилин түшүнбөгөндүктөн анда эмне деп айтылганын биле алган жокмун. Аталган жалган баракча Фейсбукта катталганына эки жыл болуптур. Жакында эле Фейсбуктун администрациясына кайрылып, аны өчүрттүм. Күйөрмандарыма фейк баракчалардын курмандыгы болбогула деп эскерте кетет элем.

– Жай айында Өзбекстан сизди ырчылык лицензиядан ажыратып койду эле, жаңы лицензия алдыңызбы?
- Жок, ала элекмин. Чынында мени ырчылык лицензиядан "Узбекнаво" эмнеге ажыратып койгонун толук түшүнө элекмин. "Голосящий КиВиН-2015" оюнундагы эфирди кайталап көрүп чыгышса болот. Анда "Бул – Ситора, өзбекстандык актриса, азиат улутундагы күйөөсүнүн суранычы менен бай күйөө издеп келди" деген эле сөз бар. Бул жерде улутту уяткара турган деле сөз жок болчу. Кийинчерээк "чет өлкөдө концерт берип, анда 200дөн аз адам келген" деген шылтоо айтып лицензиямдан ажыратканын айтышты. Албетте, бул күлкүлүү. Анткени мен чет өлкөдө концерт бере элекмин. Чындык каякта?

– Ошондо учурда ырдап жатасызбы же ырчылык карьераңызды токтоттуңузбу?
- Жок, ырдабай элемин. 17 жылдык чыгармачылыгымды бир ирмемде жок кылып салгандай сезилип жатат. Бул окуядан улам азыркыга чейин жаман болуп жүрөм.

– Жакында эле "Азия MIX" командасы Александр Масляковдун Жогорку Лигасынын финалына чыкты, катуу сүйүнсөңүздөр керек?
- Финалга өткөндөгү сезимдерди сөз менен айтып жеткире албайм. Ичимден "Оо, Кудай, ушундай керемет күндү белек кылганың үчүн рахмат!" деп сүйүндүм. Бул чоң бакыт.

– Кичи мекениңиз тууралуу да айта кетсеңиз?
- Таттуу балалыгым тарыхы бай Бухара шаарында өттү. Секелек кезде эркекке окшогон кыз элем. Биринчи класска барганда эле мага "Шоколад" деп ат койгону үчүн 3 баланы сабап салгам. Бак-дарактардын үстүнө тырмышып чыгып, кээде ошол жакта уктап калчумун. Бир жолу ошентип уктап калып арыкка кулап түшүп, бирок эч жерим сыйрылып, сынган эмес. Атам "бакка чыкпа, сен кызсың, назик, сулуу болушуң керек. Карачы, эркекке окшоп денеңдин баары тырык" деп урушчу. Чынында атам "бул кандай кыз болот?" деп коркчу экен. Анткени мен тентектик кылып жүрө берчүмүн, эч нерседен коркпойт элем.

– Актриса, ырчылыктан сырткары модельерликке да кызыгат экенсиз?
- Кичинемден эле белгилүү дизайнер болом дечүмүн. Өзүмдүн биринчи кесибим актриса, бирок 2002-жылы модельер-сүрөтчүлүк орто окуу билимине ээ болуп, училищени кызыл диплом менен аяктагам. Бүгүнкү күнгө чейин КВН оюндарына, концерттериме кийип чыккан көйнөктөрүмдүн эскизин өзүм чийип, тигем. Кудай буюрса, белгилүү дизайнер болуп өзүмдүн коллекциямды чыгарсам дейм.

– Өзүңүз Ташкентте жашасаңыз, Орусияга оюндарга катышуу, даярдануу үчүн тез-тез каттап турсаңыз керек?
- Ооба, мен кыла турган жумуштарымдын баарын абалга жараша бөлүштүргөнгө мажбурмун. Анткени КВН ойногону Ташкенттен бери учуп келип, оюндан кийин үйүмө эс алганы эмес, жумуштарыма жетишүү үчүн кайтып келем.

– Маек нугун жеке жашооңузга бурсак. Жолдошуңуз "чыгармачылыгыңды ташта" десе эмне кыласыз?
- Үй-бүлө – бул жашоодо сени толуктап турган адамды табуу. Ал сенин экинчи башың, колуң, бутуң, тең жарымың болушу керек. Мени менен тагдырын байлагысы келген жигит кимге үйлөнүп жатканын билип, менин кызыкчылыгымды, чыгармачылыгымды эске алып үйлөнүшү керек.

– "Азия МIX" финалдан утса, турмушка чыгам" деп айткан экенсиз?
- Жеке жашоом тууралуу көп айткым келбейт. Эгер финалдан утуп калсак, анан кыялымдагы ханзаадага жолугуп калсам, албетте, турмушка чыгам.

Лунара Бекиева
star@super.kg