Сайкал Садыбакасованын сахнада жүргөнүнө быйыл 15 жыл болуптур. Учурда ал "декабрь айында Бишкекте алгачкы концертимди берем" деп даярданып жүргөн чагы.

– Салам, Сайкал, сахнада жүргөнүңө көп жыл болду, өзүңдү жеке концерт берүүгө бышып-жетилдим деп ойлойсуңбу?
– Саламатсыздарбы, ооба, чынында мындан 5-6 жыл мурун деле жеке концертимди бере алмакмын. Буйрук экен, быйылкы жылга туура келди. Учурда жаңы ырларды жаздыруу менен алекмин. Өзүмдүн репертуарымда 50дөн ашуун ыр бар, алардын баарын концерттик программага киргизүү кыйын болуп жатат. Концертибиздин сценарийи 6 бөлүктөн турат. Бул сценарий дагы кыскарат. Апама "мен 10 саат концерт коёмбу" деп жатам. Чыгармаларым көп болгондуктан, көпчүлүк ырларымды попурри кылып жаздырдык.

– Ырчылар концертти күзүндө көп беришчү эле, сен эмнеге кыш айына токтолдуң?
– Негизи мен 10-декабрь – апам экөөбүздүн туулган күнүбүздө берели дегем. Бирок ал күндөрү Спорт Ордосу бошобой калды. Быйыл менин мүчөл жылым, буюрса, абдан жемиштүү болду. "Кыз-Бурак" тобу менен көптөгөн мамлекеттик деңгээлдеги иш-чараларга катыштык. Өзүмө, "Кыз-Бурак" тобуна жаңы ырларды жаздырып, клиптерди тарттырдык. Апам жыл башында "сенин жеке концертиңди өткөрөбүз" дегенде тамашалап жатат го деп ойлогом, жыл аяктаганда минтип тамашасы жок эле менин максатым, эмгегимдин үзүрү ишке ашып жатканына кубанып отурам.

– "Жеке концертимди бергенден кийин жеке турмушумду ойлоном" деп калдың...
– Ооба, акыркы убакта апам да кабатырланып, "турмушка чык" деп көп айтчу болду. Апамдын "31-декабрга чейин жигитиң менен тааныштырасың, болбосо январда берилген убакыттын мөөнөтү бүтөт. Ошондо мен айткан жигитке турмушка чыгасың" деген талабы бар. Ошентип сүйлөшүп, экөөбүз кол алып беришкенбиз. Эми эмне болот билбейм (күлүп). Качан турмушка чыгам, ал Кудайдын буйругунан да. Концерттен кийин турмушка чыгуу тууралуу ойлонуп баштайм дегеним ушундан.

– Болочоктогу жолдошуң чыгармачылыгыңа каршы болсо эмне кыласың?
– Мен апамдын курсагында жаткандан баштап эле ыр, музыка угуп чоңойдум. Үйүбүздөн атактуу ырчы эжекелерибиздин кешигин жеп, алар тамак ичкен идишке тамак ичип өстүм. Кыскасы, менин жашоом чыгармачылык менен жуурулушуп калган. Бирок үй-бүлө ыйык. Аял киши үчүн үй-бүлө бардык нерседен өйдө турушу керек. "Күйөөсүн ыраазы кылган аял бейишке чыгат" деп коёт эмеспи. Эгер келечектеги жолдошум мени бүт тараптан камсыз кылып, сахнаны ташта десе, албетте таштайм. Бирок сахнаны таштоо мен үчүн оор болот.

Лунара Бекиева
star@super.kg