Студенттик мезгил – бул таттуу жашоодон тагдырыңды чечүүчү мезгилге кадам таштаган убак. Ар ким алынын жетишине карап иш кылары белгилүү, кээ бирлери бир эле учурда окуу, жумуш жана коомдук иштерге катышуу менен ийгиликтерди багындырып жатышса, кээ бирлери окуусун да кыйратып окушпайт. 17-ноябрь – Студенттердин эл аралык күнүнө карата учурдун студенттерине саресеп салуу менен, аларды эки топко бөлүп карап көрдүк.

ИЙГИЛИКТҮҮ СТУДЕНТ

• Ийгиликке жетүүдө максатты туура коё билүү маанилүү экенин билип, максатын так аныктай баштайт.
• Максатын аныктап алган соң пландоого аракет кылат.
• Планды күндүк, айлык, жылдык кылып жазуу керектигине акылы жетип, акырындык менен аны ишке ашырууга өтөт.
• Убакытты туура пайдалана билүү жетишкендик экенин билет.
• Адам өзүнө ишенгенде ийгилик болорун билет жана лидерлик сапатка ээ болот.
• Сабак берген бардык окутуучуларынын аты-жөнүн толук билип, аларга сылык кайрылат.
• Сабактарга катышууда активдүүлүгүн көрсөтүп, мугалимдердин көзүнө илинип калууга аракет кылат.
• Окуу жайда болгон иш-чараларга кол кабыш кылуу же өнөрүн көрсөтүү ийгиликтүүлөргө жакшы мүмкүнчүлүк.
• Окуп жаткан адистиги боюнча тажрыйба топтоо кийинки келечекке ачылган жол экенин билип, колунан келишинче тажрыйба топтоого аракет кылат.
• Жакшы окуса стипендия ала турганын билет жана ага аракет кылат.
• Экзамендерди убагында тапшыруу жана жакшы бааларды алуу анын биринчи планы болгондуктан, ага алдын ала даярданат.
• Эс алуу күндөрү жөн эле жатпастан, ылайыгы чыккан жумуштарга иштөө менен кем-карчын толуктайт.
• Таза, тыкан жана жарашыктуу кийим кийүү – бул да болсо чоң жетишкендик экенин билет.
• Диплом алуу менен бирге жумуш табуу кыйынчылыгы көпкө узабайт.
• "Жакшыны жакшы жандайт" дегендей, айланасына жакшы адамдарды чогултуп, достукту да баалай билет.
• Жеке жашоосу да четке калбай, эки чылбыр бир тизгинди кошо ала кетүү ал үчүн өтө мааниге ээ.
• Эң негизгиси коомдо өз орду бар инсан болуп жетилет.

ИЙГИЛИКСИЗ СТУДЕНТ

• Студенттик жашоонун доорун сүрүүнү биринчи орунга коюп, окууну экинчи орунга калтырат.
• Келечек мааниге ээ эмес, "башыбызга жазганды көрөбүз" деген ураан менен жашайт.
• Окуп жаткан адистиги менен иштөөнү башынан эле максат кылбайт.
• Өзүнө ишенбегендиктен өзүн сынап көрүштөн коркот.
• "Баары бир окуп бүтөм" деген принципти катуу кармап, төлөп жаткан окуу акысына таянат.
• Ал үчүн сабактан калуу же кечигүү кадимки эле көрүнүш.
• Экзамен тапшыруу учуру келгенде тааныш издөө менен убара.
• Китепканаларга барбаганы менен, аны интернет клубдардан кездештирүү оңой.
• Стипендия алууга кызыкпайт, анткени ал үчүн болбогон эле акча.
• Шылтоолорго бай болуп, суудан кургак чыкканды жакшы билет.
• Шаан-шөкөттөрдү жакшы көргөндүктөн, болор-болбос нерсеге майрам уюштурууну адатка айланткан.
• Ыгы жок ата-энесинен акча сурап, жөнү жок нерселерге коротуп жатканын ойлобойт.
• Диплом алар-албасы белгисиз, эң негизгиси кара күчүнө таянып оокат кылары бештен белгилүү.

«Супердин» сурак бурчу

Студент бир эле учурда окууга жана иштөөгө убакыт таба алабы?

Гүлмайрам Асылбекова, 21 жашта, Чыгыш университетинин студенти:

– Бир гана окуу менен чектелбешиң керек. Баарына жетишип аракеттенсең болот, иштеген жумушуң сенин келечектеги кесибиңе байланыштуу болушу керек. Мен журналистика жаатында окуп жаткандыктан кошумча жумушум ошого байланыштуу болсо жакшы болмок.

Илимбек Сыдыков, 19 жашта, Касым Тыныстанов атындагы Ысык-Көл мамлекеттик университетинин студенти:

– Сабактан чыккандан кийин дайыма байкеме жардам берип, эмерек жасоочу цехте иштейм. Менде убакыт жетиштүү эле. Экөөнү бирдей алып кеткен жакшы экен, акча жаатында маселе болбойт, баскан-турганыңа да кенен жетет дегендей.

Тинатин Кубанычбекова, 21 жашта, Кыргыз мамлекеттик медициналык академиясынын студенти:

– Медицина тармагында окугандыктан иштегенге убактым жок. Себеби эртең менен башталган сабагыбыз кечинде аяктайт. Ошондой эле сабак да окушум керек. Негизи эле бизде окугандарга окуу менен жумушту бирге алып кетүү оор болгондуктан иштебейм.

Адилет Моңолдоров, 20 жашта, Ишеналы Арабаев атындагы Кыргыз мамлекеттик университетинин студенти:

– Башынан эле иштебей коюуну чечкем. Себеби коомдук иштерге катышып, сабактарды жакшы окуп стипендия алууга убактың кенен болот экен. Окууну бүткөндөн кийин деле өмүр бою иштеп жетишсек керек.

Аида Жумадилова, 21 жашта, Кыргызстан эл аралык университетинин студенти:

– Убакыт тапса болот. Мен окуудан чыккандан кийин кафеге жумушка барам. Ал жакта администратор болуп иштейм. Сабактарымдан калганда жетишип окуп алууга аракет кылам. Жөнү жок интернет чукулап же сүйлөшүп отура бербей иштесең пайда.

Насир Казиев, 22 жашта, Башкортостан мамлекеттик агрардык университетинин студенти:

– Албетте, студент бир убакта окуп жана иштесе болот. Бирок көпчүлүк студенттер жумушка берилип кетип, окууну таштап коюшууда. Ошондуктан биринчи окууга жакшы көңүл буруп, андан кийин башка жумуштарга иштесе болот.

Айсалкын Качкынбекова
koom@super.kg