Ырчы Иса Өмүркулов карындашы Альбинанын 5 айдан бери ооруп жүргөнүн, анын өмүрүн сактоо үчүн көп каражат керектигин айтып интернет баракчасы аркылуу элге кайрылган эле. Бул боюнча ырчыга байланышканыбызда: "Альбина бир тууган агамдын кызы. Учурда 2 жашка чыгып калды. Бөйрөк оорусуна чалдыкканын билгенибизге 5 ай болду. Ошондон бери карындашымдын өмүрү менен күрөшүп келебиз. Башында баары жакшы болчу, "бөйрөгү ооруйт" дешкенинен ооруканага алып барып дары-дармегин алып коюп жүргөнбүз. Көрсө, ал кабыл алган витаминдер организмге сиңбей, заара аркылуу сыртка чыгып кетип жатыптыр. Врачтар "убара болбогула, кыз 1-2 жыл гана жашашы мүмкүн. Бул курактагы балдар операцияны көтөрө алышпайт" дешти. Азыр кымбат дарылар менен жашап жатабыз. Бир аз чоңойгондо операция жасатып, карындашым сакайып кетет деген үмүтүбүз чоң. Операция Түркияда жана Орусияда жасалып, көп каражат кетет экен. Ошондуктан кайрымдуулук концерттерди, акцияларды уюштуруп, банк эсебин ачып элге кайрылууга аргасыз болдук",- дейт.

star@super.kg