Айжамалды жакындан көргөн киши “Кабылова ушулбу, кичинекей эле кыз турбайбы” деши мүмкүн. Бирок кара торусунан келген бул айым сахнада ырдап жатып жылмайганда мырзалар өзүн араң кармашат. Ал эч нерсе эмес, бут кийимин чечип салып бийлегендечи... Мына ушул баарыбыз сүйгөн Айжамал бүгүн бизде мейманда.

– Айжамал, келе жаткан Жаңы жылың менен! Бул жыл сен үчүн унутулгус жылдардан болду окшойт.
– Рахмат, силердин да Жаңы жылыңар менен. Негизи ар бир жыл жакшы да, жаман да окуялары менен эсте калат эмеспи. Өзүңүздөр байкагандай, жыл башында өтө оор сыноону башымдан өткөрдүм. Бирок мөгдүрөп отуруп калбай, жүрөгүм эңсеп, жан дүйнөм дегдеген чыгармачылыкка кайтып жакшы ырларды элге жеткире алдым. Клип тарттырып, дуэттерди жаздырып, Ош шаарында Гүлнара Калдарова менен биргеликте дуэт концерт берип, элдин алкышына ээ болдук. Өзүңүздөр билгендей, Малайзияга барып эс алып кайттым, балдарым мектеп босогосун атташты, айтор, ийгиликтүү, унутулгус жылдардан болду десем жаңылышпайм. Жакшылыкты элден айрыбасын дейт элем, Кудайдын куттуу күнү тойлордо кызмат кылып жаттым. Ал жактан тапканым балдарымдын ырыскысы деп билем. Жакында эле балдарым үчүн темир тулпар алдым, кичине болсо да ак эмгектин акыбети. Суукта жөжөлөрүм мектепке машина менен барып жыргап калышты.

– Сыноого сынбай, тескерисинче чыйралып, ийгилик жаратуу ар бир эле адамдын колунан келе бербесе керек...
– Сыноону да Кудай көтөрө алган адамга берсе керек. Айрымдарга байлык-бийлик берип сынаса, кай бирлерди жакындарын алып коюп кыйнайт экен. Мени үй-бүлөмдөн ажыратып сынады, Кудайга миң мертебе шүгүр, ушундай тагдыр бергенине. Элдин колдоосу, жакындарымдын жардамы менен андай кыйынчылыктан чыгып кеттим. Өкүнбөйм, тескерисинче, бул тагдырыма ыраазымын. Анткени көзүм ачылып, мага ким дос, ким кас, жакындарымдын кимиси күйүп, кимиси күлөрүн билип алдым. Ак-караны ажыратып, жадакалса өмүрлүк жолдошумдун ким экенин иргеп алганымдын өзү чоң жетишкендик. Мындай кыйынчылыкка сынмак турсун, турмуштук сабак алдым десем болот. Башкача айтканда, мурунку турмушума караганда азыркы жашоом жакшы.

– "Мурунку турмушума караганда азыркы жашоом жакшы" деп калдың, балдарды жалгыз тарбиялоо кыйынчылык жаратпайбы?
– Жалгыздын иши жалгыз, албетте, оорчулук болот. Кээде сабактарына көз сала албай калам. Ошондуктан кызым Жыпараны сабактан кийин кошумча ийримдерге бердим. Мен сабактарына каралаша албай калганда үй тапшырмаларын ошол жактан даярдайт. Өзү дагы зирек, кабыл алуусу күчтүү, жакшы окуйт. Балдарымдын мага берген жардамы, колдоосу мына ушул сабакты жакшы окуганы.
Андан сырткары жакында иним үйлөнүп кайнеже болдум. Келиндин кызматын көрүп колум узарып калган убак. Мен борборго келгенде же той-топурга кеткенде келиним менен иним балдарымды карашат. Мурунку турмушума караганда азыркы жашоом жакшы деп жан дүйнөмдүн тынчтыгын айтып жатам. Учурда балдарым жанымда, жакындарым кашымда. Сүйүктүү чыгармачылыгым менен алектенип жатам, албетте, азыркы жашоом жакшы да.

– Өзүң дайыма күлүп жүргөнүң менен, мүнөзүң катуудай сезилет...
– Ошон үчүн артистмин да (күлүп), ачууга алдырбай, кыялыңды ката билүү да маданият. Сахнада күлүп-жайнаган менен, сахнанын артындагы Айжамал такыр башка. Тактап айтканда, балдарыма катаал энемин, аларды катуу кармайм. Эзилип, элжиреп отура берген энелердин катарына кирбейм. Тартипке бекем кылып тарбиялайм. Ал эми мүнөзүмдү жанымда жүргөндөр айтпаса өзүмдү мактай да, жамандай да албайм. “Кемчиликсиз адам болбойт” дейт го. Ит жылында төрөлгөм, “жылыңа жараша кыялың бар” деп апам урушуп калган күндөр болгон.

– Сенин жүрөгүңдү ооруткан адамды кечире аласыңбы?
– Чыгармачыл адамдардын жан дүйнөсү назик, өтө ишенчээк болот. Жакшыны да, жаманды да жүрөккө жакын кабыл алабыз. Жал­ганды сүйлөй албайбыз, таарынсак да бат жазылабыз. Анан ушундай мүнөздү башкалардан да күтөбүз. Бирок көбүнчө баары тескерисинче болуп кетип, жүрөктөр жабыркап калган учурлар чанда кездешет. Мен эмне деген кыйынчылыктарды башымдан өткөрдүм, баарына туруштук бере алдым. Демек, баарына чыдаган Айжамал андайларды кечирип, унута да алат. Кечире билүү да чоң эрдик.

– Жаңы жылды кимдер менен, каяктан тосоюн деп пландап жатасың, жакындарыңа белек-бечкек даярдап койдуңбу?
– Жаңы жылды Ошто апам, бир туугандарым, балдарым менен тосом. Буюрса, даярдыктар жакшы, белек-бечкегимди камдап койдум. Балдарым Аяз атага катты 1 ай мурун эле жазып беришкен. Аларга өзүм Аяз ата болуп, тилектерин орундатканга аракет кылдым. Мен Аяз атага, Жаңы жылга байланышкан ар кандай ырым-жырымдарга деле ишене бербейм. Ошентсе да Жаңы жылда балдарымдын амандыгын, ыйманын, келечегин сурайм. Анан да эч бир аялзатынын көз жашы акпаса экен дейт элем. Адам баласы алдыга умтулуп жашайт эмеспи, алдыда максаттар, пландар көп. Алардын бирин айта кетсем, жазында Бишкекте жеке концерт берсемби деп жатам.

– Чыгармачыл адамдар үчүн Ошко караганда борбордо иштөө ыңгайлуу эмеспи, Бишкекке көчүп келүү планың жокпу?
– Үйдө апам жалгыз, ошондуктан апамдын жанындамын. Балдарымды да Оштогу мектепке окуттум. Ушундай шартка байланыштуу ал жакта жашасам да бир бутум Бишкекте. Анткени теле, радио, гезиттердин баары борбордо эмеспи. Кудай буюрса, бул жакка келе турган ойлор бар. Баарын убакыт көрсөтөт.

– Маегиңе чоң рахмат!

Замира Рахманбердиева
star@super.kg