Казакстан чек арасындагы ветеринардык көзөмөлүн албай жаткандыктан, кыргыз фермерлери өндүргөн продукцияларын экспорттой албай жатышат. Кыргыз тараптын эт жана сүт азыктары ЕАЭСтин базарларында сатыкка чыкпай турат. Кыргыз мамлекети 2015-жылдын 12-августунда ЕАЭСтин толук укуктуу мүчөсү болгон. Ушул жылдын 26-декабрь күнү Орусиянын Санкт-Петербург шаарында болуп өткөн Жогорку Евразия экономикалык кеңешинин жыйынына президент Алмазбек Атамбаев катышып, бышып чечилбей жаткан маселелерди талкуулоону сунуш кылды. «Көп өзгөрүүлөр болду: позитивдүү учурлар да, кемчиликтер да. Айрым учурларда терс көрүнүштөр басымдуулук кылып жатат. Ал кыргыз элинин өлкөнүн Евразия экономикалык биримдигине кошулушун кабылдоосуна тескери таасирин тийгизүүдө»,- деди президент.
Буга чейин, 2016-жылдын 26-октябрында Казакстан кыргыз-казак чек арасындагы зыяндуу продукцияларды текшерүүчү фитосанитардык көзөмөлдү алган. Жогорку Евразия экономикалык кеңешинде да казак тарап менен ветеринардык көзөмөлдү алуу боюнча сүйлөшүү жүрүп, бирок оңдуу жыйынтык берген жок. "Казакстандан башка ЕАЭСтин бардык өлкөлөрү Кыргыз мамлекетиндеги ветеринардык көзөмөлдү алууну жактырган. 4 өлкөнүн эксперттери кыргыз тарап дээрлик бардык шарттарды аткарды, продукциясын чыгарууга болот деп айтышкан. Бул маселени дагы иштеп чыгабыз",- деди вице-премьер Олег Панкратов.
Отурумдун жыйынтыгында Кыргыз өлкөсү Соода-экономикалык саясатты өнүктүрүү тууралуу билдирүүгө кол койбой койду. Аталган билдирүүдө ЕАЭСтин чет өлкөлүк өнөктөштөрү менен кызматташуунун негизги принциптери белгиленген, тагыраагы, башкы максаты союздун эл аралык экономикалык байланыштарын өнүктүрүү болуп саналат. Мамлекеттин мындай кадамы союздун ичиндеги барьерлерди алуу зарылдыгына байланыштуу.

Бектур Токтоноев,
politika@super.kg