Бийчи, шоумен Бакыт Байсариев: "Мурунку жубайым Наргизанын маегинен кийин менин дарегиме адилетсиз сындар айтылып жатат. Азыркы жубайым Алияны токол, экинчи аял деп атагандар болууда. Бул сындар менин кайын журтума да катуу тийип, келинчегиме ыңгайсыздыкты жаратууда",- деп редакциябызга баш бакты.

– Салам, Бакыт. Интернеттеги сындарга нааразы болуп, акыйкаттык үчүн тактоо киргизейин дептирсиң. Анда кеп кезеги өзүңдө.
– Саламатсыңарбы? Эл мени "мотурайган 2 баласын таштап, ата-энесин, жубайын карабай башка аялга кетип калды" деп ойлоп жатыптыр. Андыктан мен чындыкты айтып, адилетсиз сындарды токтотоюн деп чечтим. Наргиза экөөбүздүн жашабай калганыбызга 2 жыл болду. Кайсы бир адамдар табышып жаткан дүйнөдө кайсы бир түгөйлөр тил табышпай калышат экен. Наргиза менен жаман-жакшы айтышпай эки жолго түшкөнбүз. Мен идеалдуумун, периштемин дебейм, менде да кемчилик бар. Наргизага бакыт гана каалайм, жашоодо сүйүүсүн, бактысын тапсын. Менин жашоомду билбей туруп сындагандарга айтарым, меникиндей тагдыр силердин башыңарга түшпөй эле койсун.

– Балдарыңа каралашып турасыңбы?
– Балдарымдан баш тартуу деген ой түшүмө да кирген эмес, аларды багам, чоңойтуп бутуна тургузам. Окуусуна, жумушуна, жашоосуна жардам берем. Апасы экөөбүздүн тил табыша албай калганыбызга алардын эч бир күнөөсү жок. Кудай буюрса, жазында балдарыма 2 бөлмөлүү батир сатып берем. Алар учурда чоң атасынын үйүндө жашап жатышат. Наргиза өзү айткандай, кайын журту менен эмес, апасыныкында жашайт. Балдардан кабар алганы келип-кетип турат. Буюрса, быйыл баламдын сүннөт тою менен ата-энемдин юбилейин өткөрөм. Өзүңөр билгендей, кыздуу болгонбуз, жентек той менен чогуу үйлөнүү-үлпөт тоюбузду берүүнү пландап жатабыз.
Алия эл ойлогондой менин үй-бүлөмдү бузуп тийген жок. Ажырашканыбыздан жарым жылдан кийин Алияны жолуктуруп, жарым жыл сүйлөшүп, анан ата-энесине барып батасын алып үйлөнгөм. Өзү 20 жашта, ортобузда Айчолпон деген кызыбыз бар.

star@super.kg