"Инсан" тобунун солисти Тынай Алыбаев жол эрежесин бузгандыгы үчүн патрулдук милиция кызматкерлеринин кайырмагына түштү. Окуя 4-март күнү Бишкек шаарындагы Ахунбаев, Малдыбаев көчөлөрүнүн кесилишинде болгон. Патрулдук милиция кызматкерлери рейд жүргүзүү маалында жол эрежесин бузуп каршы тилкеге чыгып кеткен унааны токтотушкан. Рулдагы айдоочу белгилүү ырчы Тынай Алыбаев болуп чыккан. Андан соң МАИ кызматкерлери тиешелүү документтерин көрсөтпөй жаткан ырчыны текшерүүдөн өткөрүү үчүн наркологиялык борборго алып барышкан. Ал жактан тартылган видеотасма интернетке чыкты. Наркологиялык борбордун кызматкерлеринин "эмне ичтиң, канча ичтиң?" деген суроосуна ырчы "арак ичтим, канча ичкенимдин айырмасы барбы, бир чака ичтим" деп тамаша аралаш жооп узаткан. Андан соң видеокамерага кайрылып, "мен мыйзамды аткарам, мыйзам баарына бирдей. Бардык кыргыз элине кайрылам, мыйзамды аткарышыбыз керек" дегенин көрүүгө болот. Жыйынтыгында ырчынын ичимдик ичкени такталып, унаасы айып аянтчасына токтотулду.
Шаардык патрулдук милиция башкармалыгынын басма сөз кызматчысы Таалай Бугубаев: "Бул ишти Октябрь райондук соту карап жатат. Анын негизинде жол эрежесин бузган жаран 10 миң сом өлчөмүндөгү айып пул төлөйт. Мындай сумманы төлөй албаса 5 суткага камакка алынат",- деген маалымат берди.

star@super.kg