"Супер-Инфо" гезити жарык көргөндөн бери аны сатуу менен үй-бүлөсүн багып келген жарандарыбыз көп. Биз Кыргызстандын булуң-бурчунда "Супер-Инфо" гезитин сатып иштегендердин көбү менен байланышып, гезит сатуунун сырларын, түйшүктөрүн сурап көрдүк. Бардыгы "гезиттин өтүмдүүлүгү жакшы үчүн иштеп жүрөбүз" деген жылуу пикирлерин айтышты. Ошолордун арасынан Абдылда Осмонбеков жана Жыпара Тентимишова бизге гезит сатуудагы ар кандай окуяларды жана кызыктуу учурларды айтып беришти

"ДАЙЫМКЫ КАРДАРЛАРЫМА УБАГЫНДА ГЕЗИТ ЖЕТКИРҮҮ – ЧОҢ ЖООПКЕРЧИЛИК"

Абдылда Осмонбеков 76 жашта. Бул аксакал 8 жылдан бери "Супер-Инфо" гезитин сатып иштейт:
– Талас облусуна караштуу Бакай-Ата районундагы БооТерек айылында жашайм. "Супер-Инфо" гезити кызыктуу чыккандыктан окурмандары көп болуп, бат эле бул ишке аралашып кеттим. Мурун айылдагы дыйкан чарбада катардагы кызматкер элем. Пенсияга чыккандан кийин үйдө бош отуруп калгам. Бош жатпастан кыбырап гезит сатууну туура көрдүм. Жаңы иштеп баштаганда жети жүздөн ашык гезитти бир заматта сатып коёр элем. Эми болсо мага окшогон сатуучулардын саны көбөйүп, жумасына 300-400 гезиттин тегерегинде сатып жатам. Өзүм Бакай-Ата районунан Кара-Буура районуна чейин кыдырып сатам. Ушуга да шүгүр, ар ким өз мүмкүнчүлүгү жетишинче сатып оокат кылып жатышат. Жаздын келиши менен айдоо-себүү иштери башталып, гезит алчулар басаңдап жатат.
Гезит сатуудагы менин ыкмам – элге бул жумада кандай жаңылыктар чыкканын айтуу. Мисалы, "программа, жылдыз төлгө, саясат жана жакшы жаңылыктар чыгыптыр" деп айтып турам. Дайыма "Супер-Инфо" гезитин алган кардарларым көп, аларга убагында жеткирип берүү менин эң чоң жоопкерчилигим. Кээ бир кардарларым менден алыс жашагандыктан аларга такси менен жеткирип келем. Соодада достук жок дегендей, кардарлар менен соодалашабыз. Жума сайын гезит алып, акчасын эки-үч айда бир топтоп бергендери да бар. Жаш өткөн сайын унутчаак болуп калдым, кээде айрымдарына таштабай өтүп кетсем таарынып калышат. Алыскы жерге гезит сатып баратканда кызыктар көп болот, кээде машинанын дөңгөлөгү жарылып, жолдо калган күндөр да болот. Андай учурда жолду карай мени келет деп кардарларым бир нече саат күтүп калышат. Гезиттеги сериалдарды кубалап окуган адамдарды көп көрдүм. Таң калтырганы, гезитти алар замат сериалын дем тартпай окуп, анан ойлонуп отуруп калышат.

"ЖУМАСЫНА 3 МИҢ СОМДОЙ КИРЕШЕ ТҮШӨТ"

– Жеке өзүм "Супер-Инфонун" ар бир барагын шашпай барактап чыгам. Өткөнкү санында "Пенсия кантип эсептелет?" деген макаланы жакшы жаздыңар. Аны ар бир эле адам окуп, билип алды болуш керек. Себеби пенсия кантип эсептелерин, кантип чыгып келерин карапайым эл билбейт да. Мына, силердин башкалардан айырмаңар айттырбай элдин талабын билип, ийне-жибине чейин түшүнүктүү кылып жазганыңарда болуп жатпайбы. 8 жылдан бери "Супер-Инфону" сатып көп эле киреше таптым. Жумасына 2500-3000 сомдой киреше түшөт. Бул акчага керектүү буюмдарды, өзүмдүн кийим-кечемди алам.
Балдар болсо "үйдө эле отуруңуз" дешет, бирок жөн эле жата бергенге моюн жар бербейт. Мына, өткөн жумада соода жакшы болду. Бардыгын сатып бүтүп, кийинки санынан канча гезитке буйрутма берсем деп ойлонуп жатам. Ал эми "Супер-Инфонун" жалпы окурмандарына замандан артта калбаңыз дейт элем.

"СУПЕР-ИНФОДОН" БАШКА ГЕЗИТ САТПАЙМ"

Кочкор районунун тургуну Жыпара Тентимишова 3 жылдан бери гезит сатып иштейт:
– Ар жума жаңы чыккан "Супер-Инфо" гезитин бейшемби күнү түнкү саат 2лерде барып автобустан тосуп алам. Өзүмдүн унаам бар, аны айдап алам. Жума күнү таң атары менен соода кызыйт. Өзүм болсо көп жылдан бери Кочкор районунда соода кылам. 3 жыл мурун башка товарларыма кошуп 30-35тей гезит алып сатып көрдүм. Байкасам, өтүмү жакшы экен, кызыга баштадым. Гезиттен "атайын иштешүү үчүн чакырабыз" деген жарнаманы окуп, аларга байланыштым. Ошентип азыркы иштешип жүргөн "Супер-Инфонун" кызматкерлери менен таанышып, иштеше баштадым. Андан бери 3 жыл өттү, жакшы эле сатып келе жатам. Окурман катары да "Супер-Инфонун" ар бир чыгышын чыдамсыздык менен күтөм. Сканвордду толтурганга шашам. Аны бир жаңсыл кылып коюп анан тагдырларды окууга киришем.
Гезит сатуудан мага ар санында болжол менен 1700-1800 сомдой акча түшөт. Түшкөн акчанын ар эки жумасыныкын чогултуп козу же кой алам, ошентип жатып короомо көп мал топтой алдым. Албетте, бул жакшы жаңылыкты кайра "Супер-Инфонун" кызматкерлерине айтып жатканым кубанычтуу.
Башка сатуучулар сыяктуу эле менин да дайымкы кардарларым бар. Кошуналарым болсо алдын ала эле телефон чалышып, гезит келер замат айтып коюшумду эскертип турушат. Андайларга мен да биринчи кезекте алып коём. Негизи ишемби күнү кечке чейин гезитти сатып бүтүрүүгө аракет кылам. Өткөн жумада болсо алган гезиттерим тез түгөнүп, көп кардарларга жетпей калды. Эмки жума көбүрөөк алайын деп жатам. Азыр ойлосом, ушул убакка чейин "Супер-Инфодон" башка гезитти сатып көрбөптүрмүн. Гезитке терең ыраазычылык билдирем. Мен үчүн "Супер-Инфо" пайдалуу жана кызыктуу маалымат берген, маңдай тер, адал эмгек менен акча таптырган булак.

Айсалкын Качкынбекова
koom@super.kg