2017-жылдын 9-апрель күнү Ысык-Көл РИИБинин нөөмөт бөлүмүнө саат 16:45тер чамасында Жети-Өгүз районунун Кызыл-Суу айылындагы үйлөрдүн биринде белгисиз адамдын жансыз денеси табылгандыгы тууралуу маалымат келип түшкөн. Окуя болгон жерге барган Жети-Өгүз РИИБинин ыкчам тобу маркум киши колдуу болуп каза тапканын аныкташкан. Маркум ал үйдүн ээси, 1961-жылы туулган Мелис Дардиев аттуу жаран болуп чыккан. Окуя болгон жерге кароо жүргүзүлүп, үйдүн ичиндеги кан болгон буюмдар, бычак далил буюм катары алынган жана ичимдик ичилгендиги байкалган.

"ТЕРГӨӨ ИШТЕРИ УЛАНУУДА"

Бул окуя боюнча Ысык-Көл РИИБинин башчысынын орун басары Талант Ашыралиевге байланышып, төмөнкүдөй жооп алдык:
– Окуя болгон күнү эле кылмышка шектүү катары 1991-жылы туулган аталган айылдын тургуну Б.А. аттуу кыз кармалган. Азыркы учурда анын үстүнөн Кылмыш жана жаза кодексинин 97-беренеси (адам өлтүрүү) боюнча кылмыш иши козголгон. Кылмышка шектүү убактылуу кармоочу жайга киргизилип, тийиштүү экспертизалар дайындалып, тергөө иштери жүргүзүлүп жатат. Маркум Мелис Дардиев үй-бүлөсү менен ажырашып, үйүндө жалгыз жашап жүргөнү белгилүү болду. Айылдаштарынын айтымында, кээде спирт ичимдиктерин ичип коюп жүрчү экен. Ал эми шектүүнүн ата-эне, бир туугандары жок, өзү балдар үйүндө чоңойгон. Кызыл-Суу айылында жашап, туруктуу иштеген жери болгон эмес.

"БЫЧАК МЕНЕН САЙЫП, ҮЙДӨН КАЧЫП КЕТТИМ"

Кылмышка шектүү Б.А. тергөө учурунда көрсөтмө берип, бул кадамга эмне себептен баргандыгын төмөнкүдөй түшүндүргөн:
– 8-апрель күнү түнкү саат 12лерде Мелис байке экөөбүз спирт ичимдигин ичип отурганбыз. Бир убакта ал мени зордуктоого аракет жасады. Каршылык көрсөтүү үчүн столдун үстүндө турган бычак менен сайып, үйдөн качып чыгып кеттим.

Айсалкын Качкынбекова
koom@super.kg