Өткөн аптада Айчүрөк Иманалиева көп жылдар бою өзү ырдап жүргөн "Махабат көлү" деген ырды Анжелика уруксатсыз ырдап чыкканы үчүн социалдык тармактагы баракчасы аркылуу нааразычылык билдирген. Анжелика бул ырды Айчүрөк Иманалиева аткарып жүргөнүн билбестигин айтып жооп берди. Эки ырчынын чыры кыргыз шоу-бизнесин эки жээкке бөлүп, "жарашкыла" дегендер да чыгууда.
Бул боюнча Айчүрөк Иманалиевага байланышканыбызда, ал төмөндөгү жоопту берди.

"КЫЗЫМА ЫР ЖАЗДЫРАЛЫ" ДЕП ЖЕ АПАҢ БИР СОМ АКЧА ЧЫГАРГАНБЫ?"

– Анжелика, мен сенин жеке жашооң тууралуу ушул убакка чейин унчукпай келгем. Ушунча элдин алдында мени каралаганыңдан кийин, апаң кошулуп мен сени "улуу кишилерге тааныштырган" деген сөзүңөрдөн кийин гана үн катууга мажбур кылдыңар. Анжелика, сен менин айтканымды 100 пайыз калп деп жатасың. Баары чындык экенин өзүң жакшы билесиң, сени түшүнөм, актаныш үчүн айтылгандын баарын калпка чыгаруудан башка аргаң жок...
7 жашыңда колума келдиң, ошол кезди азыр эстейсиңби? Мен жасаганымды милдет кылган жокмун, бирок "унутчаак" болсоң эсиңе салайын. Алгачкы клиптериңди тарттырдым, ырларыңды жаздырдым. Ыр асмандан түшө калбасын билип жаткандырсың. Сөзүн жазганга, обонун жаратканга, аранжировкасын жасаганга, деги койчу, баары акча. Ага ылайыктуу костюм – бул да бир топ каражатты талап кылат. "Бул акчага кызыма ыр жаздыралы" деп же апаң 1 сом акча чыгарганбы? Жок! Элге атың чыгары менен турмушка да чыктың. Ар бир кыздын барар жери күйөө деп бак тиледим. Турмушка чыкканыңдан кийин "Эки жыл чогуу иштейли, жер кыдырып концерт коёлу, андан кийин өз алдыңча болсоң бол" деп жайынча айттым. А сен "Эже, мен такыр эле сахнадан кетем. Урмат "ырдабай эле кой, тойлордо ырдаган уят" деп жатат, намаз окуйт" дедиң. Аныңа да макул болдум. Ошол кезде "намаз окумакчымын" деп оронуп чыга келдиң. Оронгонуңдан да чечип ыргытканың тез болду.

"ЧАК ТҮШТӨ ЧАККАН ЖЫЛАНДАН САКТА"

– Анан эле "Камбаркан" оркестри менен биргеликте Бакиев Адыл Салиевич жана анын Айбек деген оң колу менен Швейцарияга чогуу кеткениңди уктум... Мени алдап ырдабайм дебей, ачык эле "сизге иштегим келбейт, кылганыңызга ыраазы болуңуз" деп кетсең деле болмок. Ушундай ирээнжиткен калпыңдан кийин ачуум менен эмне иш кылып жүргөнүңдү күйөөңө жана ММКларга айтам дедим. Ошондон 2 жума өтпөй машинабызды талкалап, жолдошум экөөбүзгө кол салуулар болду. Мага телефон аркылуу "Анжелика жөнүндө эми бир сөз айтсаң балдарыңды өлтүрүп кетебиз. Алдагы Аргениңди наркотик менен түрмөгө тыгып, эки кулагын, башын кесип, пакетке салып алып келип беребиз" дешти. Коркконубуздан экинчи уулум Арленди бир жыл чет мамлекетке качырдык. Ошондогу мен көргөн күндү сага каалабайм, Анжелика!
Американы ачып жатам дебейм, сөз кезеги келгенде айтайын, сени ал убакта Адыл Бакиев менен Айбек "колдоп" жүргөндүктөн милицияга арыз жазганыма карабай көңүл бурулган жок. Кийин гана бийлик алмашканда күнөөлүүлөр табылды. Апаң "балдардан акча алып, «отказной» жазгансың" деп жатат. Ооба, жазганым чын. Чыңгыз деген бала тааныштарды ортого салып "сүйлөшөлү" деп чакырды. Алар мага «Эже, өзүңүздүн эле кыз, эмне кыл дейсиз эми, балдарды чыгарып бериңиз. Талкаланган машинаңызга, дары-дармекке кеткен чыгымды төлөп берели" деген сөз сөз бойдон калды. Апаң айткан былчыйган акчанын, Кудай турат, бир тыйынын көргөн да, алган да жокмун. "Кенедей кезден коюнуңда жүрүп, чак түштө чаккан жыландан сакта" болгонун билип, "жыландын" кылыгынан жаш жигиттер менен жаман-жакшы көрүнүшпөй эле коёлу дедим. Бирөөлөргө кол көтөрүүгө заказ бергениң өзүңдүн кол көтөргөнүңө барабар!

"ФОНОГРАММАНЫ ЖОЙСО ТАСТАҢДАГАНЫҢДЫ КӨРӨТ ЭЛЕМ"

– «Эмнеге үнүм жок болсо ырдаткансыз?» деп социалдык желедеги баракчаңа жаздың, сөз убагы келгенде айтпасаң сөз атасы өлөт демекчи, жооп берейин, мында сенин айыбың жок, аны апаңдан жакшылап сура. Ошол кезде топтогу балдар "Анжеликаны ала берели" деп туруп алышкан. Коллективдин ою мен үчүн ар дайым чоң роль ойноп келген. Көрсө, мен концерттен кийин мейманканада калып калганымда топтогу эркек балдарды апаң коноктоп, колго алган экен... Кийинчерээк үнү ачылып кетеби дегем, бирок ачылбаган бойдон калды. Элдин батасы менен алып келгенимден кийин орто жолго таштап коюуга элдин кишиси катары адамдык намысым жол берген эмес. Эгер чынында эле үнүң укмуш болсо, эл аралык сынактарга барып байгелүү орундарды алып келип жаткан таланттуу ырчыларга окшоп сен неге сынактарга барбайсың? Эмнеге Кыргызстандын атын даңазалап желегин желбирете албайсың? Биздин Маданият министрлиги реформа жасап, той болобу, концертпи, фонограмманы жоюп салса сенин азыркыдай мага тастаңдаганыңды көрөт элем.

"МЕНИ УШУНЧА КЫЛЫП ЖАТАСЫҢ, БАШКА АДАМДЫ ЖӨН ЭЛЕ ИШЕНДИРЕСИҢ"

– Гулина апаң "кызымды килтейген кишилерге салып берерде күйөөгө берип салдым" деп жатат. Ал киши ыраматылык Мухтар Өмүракунов эмес беле? Анда сен 7-8-класста окучусуң. Москвага поезд менен концертке Назми, Сапар болуп чогуу баратып, Мухтар менен телефондон сүйүүңөр жөнүндө сүйлөшүп жатканыңды угуп Назми экөөбүз бири-бирибизди карап "тоңуп" калганбыз. Мен ошондо билдим экөөңөрдүн жакшы мамиледе экениңерди. Мухтар досум менин чыгармачылыгымды сыйлап бизди чакырган деп эле ойлогонбуз. Көрсө, иштин маңызы башка жакта экен. Өспүрүм кыз мындай чоң адамдар менен мамиле кылат деп миң уктасам түшүмө кирген да эмес. Бир күнү Мухтар чалды: «Анжелика мага чалып ооруганын айтты, үйүн билбейт экенмин, көрсөтүп барып келчи. "Кызы ооруп жатса Айчүрөк бир басып келген жок" деп айтат, жүр, досум, көрүп келели»,- деди. Болгону ошо.
Кыскасы, энеңдей болуп камкордук көргөн мага кылган мамилеңди өзүң териштир. Эгер, албетте, абийир соту деген сенде жашаса. Буга чейин да ырларымды ырдадың, «Эжекемдей боломун» деген ырымды концертиңде кыздарыңа ырдаттың. Ошол кезде мамилебиз начар болсо да наристелер үчүн чын жүрөгүмдөн сүйүнүү менен кабыл алдым. 19 жылдан бери аткарып келген "Жар-жар" ырын ырдап чыкканыңда "мейличи" деп унчуккан жокмун. Эми «Махабат көлү» деген ырымды жаздырып чыктың. Бир ооз эле телефондон "Эже, ушул ырды ырдайын деп жатам" деп койсоң мен кантип жок дейин? Менин аткаруумдагы ырларымды Съездбек Искеналиев, Асема, Асел Кадырбекова, Айгерим Расул кызы жана Алиса деген жаш кыз уруксат сурап эле жакшынакай ырдап жүрүшөт. Анан да бул кылыгыңды айтып койсом «Бул ырды сиз ырдадыңыз беле, ырдасаңыз, кана видеосу же аудиосу, көрсөтүңүз" деп талап кылып чыктың. Сен ушунчалык элди ишендирип сүйлөгөн жагынан алдыңа киши салбайсың. «Махабат көлүн» ырдаган эмессиң, кана, болсо көрсөтчү» деп мага асылганыңда мен өзүмө-өзүм ишенбей "чын эле ырдаган эмесминби?" деп да ойлоп кеттим. Радиолорго барып архивден таап келгиче жаман акыбалда калдым. Мени ушунча кылып жатасың, сырттан карап турган адамды жөн эле ишендирип коюшуң кеп эмес.
Кыскасы, жасай турганыңдын баарын жасадың, кыларыңды кылдың, эми тастаңдап мени менен ыр талашпа. Эгер мен чын эле силер айткандай жаман адам болсом, сен ошол жаман адамдын репертуарындагы ырларын ырдабай эле кой. Бирок муну да кылбай коё албайсың. Себеби сен үчүн адамдык касиет эмес, акча бийик турат. Жогоруда сен тууралуу айтылгандар мен билген фактылардын жарымы гана. Цирктеги өткөн конкурста кантип биринчиликти алганың жана Кытайдагы кылыгың тууралуу өзүң айткандай фактылар менен айта турган болсом сөз көбөйүп кетет. Мен сага тийишпеген соң сен да менден алыс бол.