Баткен облусунун Баткен районундагы Таян айылында кызыл китепке кирген боз эчкемер (эчки эмер) жергиликтүү тургундар тарабынан кармалып, 2 миң сомго сатылып жатканы тууралуу кабар таркады.

"КЫЗЫЛ КИТЕПТЕГИ ЖАНЫБАРЛАРДЫ МАМЭКОТЕХИНСПЕКЦИЯ КӨЗӨМӨЛДӨЙТ"

Эчкемерлер чындап кармалып, сатылып жаткандыгын тактоо үчүн Курчап турган чөйрөнү коргоо жана токой чарбасы агенттигинин жаратылышты пайдалануу жана экономика бөлүмүнүн башчысы Өмүрбек Мусакановго кайрылдык:
– Негизи, биздин агенттиктин өзүбүзгө тиешелүү аймактан тышкары территорияны көзөмөлдөөчү функциясы жок. Бирок ага карабастан биздин агенттикке караштуу Баткен облусундагы аймактык башкармалыкка тапшырмалар берилди. Ошолор жерине барып көзөмөлдөшөт.
Кызыл китепке кирген жаныбарлар боюнча көзөмөл Мамлекеттик экологиялык жана техникалык коопсуздук инспекциясына таандык. Андыктан маалыматты жеринен текшерүү, керектүү чечимди (айып пул төлөтүү же кылмыш ишин козготуу) чыгаруу ошолордун иши.

"ТАЯН АЙЫЛЫНДА КАРМАЛБАГАНЫ АНЫКТАЛДЫ"

Мамлекеттик экологиялык жана техникалык коопсуздук инспекциясынын Баткен, Сүлүктү, Лейлек райондору боюнча башкармалыгынын башкы инспектору Акылбек Мадымаров:
– Бул маалыматты угуп, Таян айылына барып, жаңы эле изилдеп бүттүк. Эчкемер Таянда кармалбаптыр. Сүрөттөгү бала бул айылда жашабайт экен. Биз келгенге чейин Баткен райондук ички иштер бөлүмүнүн жана Курчап турган чөйрөнү коргоо жана токой чарбасы агенттигинин алдындагы аңчылык департаментинин Баткендеги өкүлчүлүгүнүн кызматкерлери да келип, жаңы эле кетишиптир. Алар да сүрүштүрүп, иликтеп көрүшүп, "эчкемер Таян айылында кармалбаган" деп жыйынтык чыгарышыптыр. Негизи Таян айылы тоолуу жер. Ал эми эчкемерлер чөлдүү, жарым чөлдүү жерлерде жашашат. Эчкемерди элдик медицинада ракты, айыкпас тери ооруларын айыктырат деп колдонушарын уккам. Сыягы кургатылган терисин пайдаланышат. Бирок мен иштегени адамдардын Баткенден боз эчкемерди кармап, саткандары боюнча бир да факт катталган эмес. Эчкемерлер Кадамжай районунда кездешет. Сүрөт ошол жактардан тартылып, тарашы да мүмкүн.

"БИЗДЕ ЭЧКЕМЕРЛЕР ЖАШАБАЙТ"

Таян айылынын жашоочусу, 58 жаштагы Султан Саттаров:
– Таян тоолуу жер, андыктан эчкемерлер жашабайт. Ушул жашка келгени айлана-тегеректен көргөн эмесмин.

Артык Айдаров, 48 жашта, бухгалтер:
– Социалдык тармактарда жүргөн сүрөттөгү боз эчкемер кармап тургандай бала биздин айылда жашабайт. Сүрөттөгүдөй короо-жай да биздин жашоочуларда жок.

Эскерте кетсек, боз эчкемер кызыл китепке киргизилген. Аны мыйзамсыз кармоо жана жок кылгандыгы үчүн 4000 сом айып пул салынат.

Канымжан Усупбекова
koom@super.kg