Жылдыздар турмушунан

24-апрелде “Кыз-Бурактын” сулуусу Кенже Дүйшеева келин статусуна ээ болду. “Кыз-Бурактын” жетекчиси Гүлшайыр Садыбакасова кыргыз салты менен той берди. Ал эми күйөө тарап чоң тойду Алматыда июнь айында өткөрөт.

ТОЙДУН КОНОКТОРУ
“Кыз-Бурактын” 280-күйөө баласы болуу Талгат аттуу мырзага буюрган экен. Кенже Дүйшеева казак жигитинин колун кармап, турмуш сапарына аттанды. Көктөм жыттуу жаз айынын 24-апрелинде Ош шаарынын белгилүү ресторанында эки жаштын үйлөнүү-үлпөт тою болду. Тойго 400гө жакын коноктор келишти. Алардын ичинен 12си Кенженин ат арытып Алматы калаасынан келген кайындары. Тууган-уруктан сырткары Токон Эшпаев, Апаз Жайнаков, Саламат Садыкова, Шахра Талипова, Ибрагим Жунусов сыяктуу Эл артисттери, “Кыз-Бурак” тобунда иштеп кеткен 32 кыз күйөөлөрү менен келип, андан сырткары көптөгөн шоу-бизнес өкүлдөрү тойго күбө болушту. Гүлшайыр Садыбакасова: “Тойго чакырылган Гүлнур Сатылганова, Бек Борбиев, Айчүрөк Иманалиева, Асел Турдалиева менен жакшы санаалаштардан элек. Атайын чакырсам иштери чыгып калдыбы же тополоңдон коркуштубу, келбей мени капа кылышты”,- деп таарынычын билдирди.

КАЗАК-КЫРГЫЗ КУДА БОЛУШТУ

• Кенже Дүйшееванын жолдошу Талгат Алматы шаарынын прокуратурасында иштейт.
• Кайнатасы Карибай мырза Алматы калаасынын экс-прокурору.
• Кайненеси Айтжамал үй кожойкеси.
• “Казак туугандар бизге караганда калыңды көп беришет бейм, айтор, көп эле калың алдым. Бирок септи да эмеректеринен баштап жууркан-төшөк, алтургай үй тапичкесине чейин бардыгын катырып бердим. Баш-аягы 3000 долларды чапчыды”,- дейт Гүлшайыр эже.
• Эки жашты табыштырган, Казакстанда 27 жылдан бери прокурор болуп иштеген Асылбек аттуу мырза жубайы экөө өкүл ата, өкүл эне болушту.
• Жездебиз Талгатка Гүлнара Калдарованын жолдошу Мырзабек күйөө жолдош болсо, Кенженин курбу кызы журналист Айнагүл Сапарбек кызы болду.
• Учурда чек ара жабык болгондуктан, Кенже жолдошу экөө Ошто учак күтүп убара.
• Ошентип, Гүлшайыр эже өзү "таптаган" кызын кыргыздын каада-салты менен турмушка узатты. “Башка кыздарымды турмушка узатканда көп ыйлап коюптурмун, эми антпейм деп сөз берген элем, ыйлаган жокмун. Бирок ичимден ыйлап жатканым өзүмө гана билинди. Жаштардын бактылуу болушун тилейм”,- дейт топтун жетекчиси.

Бурул Исмаилова
star@super.kg