Адатта концерттерден, тойлордон, кечелерден, сыналгыдан ырчыларды артист костюмдары менен көрөбүз. Ошол таанымал жүздөр күнүмдүк жашоодо сахнага кийген кийимдерин кийип жүрбөгөнү анык. Биз билген ырчылар көчөдө кандай стилде кийинишет? Кайсы жактан кийинишет? Кызык бекен? Келиңиз анда, төмөндөгү маалыматка карап жооп алыңыз.

АЯНА КАСЫМОВА ЧАПТАШКАН КИЙИМДЕН СЫГЫЛЫП КЕТЕТ

Кийинүү стили – Классика жана кэжуал. Кенен фасондогу рубашкалар, бойфренд жана кюлот шымдарды жактырат. Анткени кыймыл-аракетти чектебейт. Жабышкан кийимдерди кийсе сыгылып кетет.
Жактырган кийимдери – Жынсы, булгаары куртка, бомбер жана пиджактын бардык түрлөрү.
Жактырбаган кийими – Чакчайган ачык түстөгү футболкалар.
Бут кийими – Кроссовка, кедалар жеңил жана көп басканга ыңгайлуу болгондуктан, классикалык кийимдер менен айкалыштырып кийе берет. Бийик такалуу бут кийимдерди кечелерде, концерттерде гана киет.
Кийинүүдө басым жасайт – Минимализм.
Жактырган түстөрү – Кийимдеринин көбү ак, кара, боз, күмүш түстө.
Аксессуарлар – Шуру, мончокторго кызыга бербейт, сейрек тагынат. Өзгөчө аксессуарлар деп сумкаларды эсептейт.
Кийимдерди кайдан алат? – Кытай, Корея, Түркия кийимдерин саткан интернет дүкөндөрдөн буйрутма менен алат. Алардын сапатына ишенет. Айрым учурда тигүүчүлөрдүн кызматынан пайдаланат.

Бүгүнкү кийинүү стили – КЭЖУАЛ

• РУБАШКА – фирмасы белгисиз, интернет дүкөндөн буйрутма менен алган – 2000 сом
  
  
• КЮЛОТ – фирмасы белгисиз, интернет дүкөндөн буйрутма менен алган – 2500 сом
  
  
• СУМКА – фирмасы “Michael Kors” , Бельгиядан буйрутма менен алган – 400 доллар
  
  
• КЕДА – фирмасы белгисиз, интернет дүкөндөн буйрутма менен алган – 6000 сом

ДАЙЫР ИСМАДИЯРОВ ГАРДЕРОБУНДАГЫ КИЙИМДЕРИНИН 70 ПАЙЫЗЫН ЧЕТ ӨЛКӨДӨН АЛГАН

Кийинүү стили – Кэжуал. Бул стилдеги кийимдер кенен, бош болгондуктан кыймыл-аракетти чектебейт. Спорттук жана классикалык кылып кийсе да болот.
Жактырган кийими – Гардеробундагы бардык кийимдери.
Жактырбаган кийимдери – Классикалык көйнөктөр, костюм-шымдар.
Бут кийими – Кроссовка жана кедалар. Спорттук бут кийимдеринин көпчүлүгүн чет өлкөдөн алат. Туфлини атайын концерттерде, той-топурларда гана кийет.
Кийинүүдө басым жасайт – Эң башкысы, кийимдин модасына эмес, анын дене түзүлүшкө, өң-келбетке жарашыктуу болушу.
Жактырган түстөрү – Кандай түстөр өңүн ачса, ошол түстөгү кийимдерди ала берет.
Аксессуарлар – 6 сумка жана 30дан ашуун көз айнеги бар. Көз айнектерин көчөдө гана эмес мекеменин ичинде, караңгыда деле тагынып жүрө берет.
Кийимдерди кайдан алат? – Борбордогу кийим соода дүкөндөрүнөн кийинет. Чет жерге көп чыккандыктан гардеробундагы кийимдердин 70 пайызын дүйнөлүк бренддеги кийимдер түзөт.

Бүгүнкү кийинүү стили – КЭЖУАЛ

• ФУТБОЛКА – фирмасы “Terranova” – 590 сом
  
  
• ШЫМ – фирмасы “Terranova” – 2300 сом
  
  
• СУМКА – фирмасы белгисиз, бир тууган эжеси Айжамал белекке берген – 300 доллар
  
  
• КЕДА – фирмасы “All Star Core”, Таиланддан алган – 800 сом

Бактыгүл Момбекова
Адилет Бектуров
star@super.kg