Ысык-Көл облусунун Балыкчы шаарынын мэри Алмаз Мамбетов менен ушул эле шаардын мурунку мэри Сатыбек Шамшудиновдун телефондогу сүйлөшүүсү делинип интернетке тараган аудиожазуу боюнча ишти атайын комиссия иликтейт. Бул тууралуу өкмөттүн Ысык-Көл облусундагы өкүлчүлүгүнөн кабарлашты. 7-августта экс-мэр менен учурдагы мэрдин сүйлөшүүсү делген аудиожазуу интернетке тарап, андан учурдагы шаар башчысы "отчёт берсин" деп кайрылууга кол койгон адамды "зордуктайм, өлтүрөм" деп коркутуп, сөгүп жатканын угууга болот. Телефондук сүйлөшүүдө мурунку шаар башчы, учурдагы шаардык кеңештин депутаты катары сүйлөп жаткан адам "ал отчёт берсин деген эле кагаз, отчёт берүүдөн эмнеге коркуп жатасың?" деген сөздөрдү айтат. Учурдагы шаар башчы катары сүйлөп жаткан адам тарабынан шаардык кеңештин депутаттарына карата "өлтүрөм, көлгө чөктүрөм" деген сөздөр айтылат.
Аталган комиссия интернетке тараган аудиожазууда сүйлөп жаткан адам чын эле мэр Мамбетовбу, териштирмекчи. Экс-мэр Шамшудиновдун айтымында, бул сүйлөшүү үстүбүздөгү жылдын 10-июлунда жазылып алынган. Чырдын негизги себеби шаардык кеңештин депутаттарынын "мэр жылдык отчётун берсин" деген кайрылуусу болгон. Балыкчы шаарынын башчысы Алмаз Мамбетов окуя боюнча комментарий бере элек. Шаар башчысы шаардык кеңештин алдында аткарган иштери тууралуу отчёт берүүсү милдет. Бул сүйлөшүүдө көрүнүп тургандай, шаар башчылары тикелей милдетин аткармак турсун, шаардык кеңештин депутаттарын "өлтүрөм" деп опузалашат экен.

Бектур Токтоноев
politika@super.kg