Президенттик шайлоого катышуу үчүн Борбордук шайлоо комиссиясына (БШК) арыз берген талапкерлердин 24ү калды. Буга чейин 20 жарандын арызы талап кылынган кол топтоо шартын учурунда аткара албагандыгы үчүн жараксыз деп табылган. 26-августта талапкерлерди колдогон жарандардын кол тамгаларын кабыл алуу аяктаган эле. Учурда мамлекеттик тил сынагын, жарандардын колдоо колдорун жана 1 миллион сомдук күрөөнү тапшырган талапкерлерди БШК расмий каттоого алууда. 6 жаран, алсак, Темир Сариев, Өмүрбек Бабанов, Бакыт Төрөбаев, Сооронбай Жээнбеков, Адахан Мадумаров жана Эрнис Зарлыков президенттик кызматка талапкер деген күбөлүк алган. Арыз берген дагы 18 талапкердин жыйнаган кол тамгалары БШК тарабынан текшерилүүдө. 30-августта Жогорку Сот Өмүрбек Текебаевди колдоого жыйналган 38 миң 643 жарандын кол тамгасын жараксыз деп тапкан БШКнын чечимин күчүндө калтырды. БШК «кол топтоо шайлоо фондунан каржыланбаган» деген жүйө менен Текебаевди колдоого жыйналган кол тамгаларды жараксыз деп тапкан эле.

Маалымат катары: Президенттик шайлоо ушул жылдын 15-октябрында өтөт. Үгүт иштери 10-сентябрдан башталат.