2017-жылдын 25-августунда Республикалык жоокерлердин энелер комитети Кыргыз Республикасынын Куралдуу күчтөрүнүн Генералдык штабы менен бирдикте жарыялаган «Мыкты аскердик бөлүк – энелердин көзү менен» жана «Республиканын мыкты аскердик комиссариаты» аттуу республикалык сынактарды жыйынтыктоо салтанаттуу мааракеси Т. Абдумомунов атындагы Кыргыз улуттук драма театрында болуп өттү.

Жоокерлердин энелери өлкөбүздүн жети дубанындагы аскер түзүмдөрүн, ар бир аскердик комиссариаттарды кыдырып, сынактын негизги критерийлери боюнча текшерүү иштерин жүргүзүп, «Мыкты аскердик бөлүк», «Мыкты аскердик комиссариат» наамына татыктууларды сынактын эрежесине ылайык аныкташты.

Бул иш-чарага жылда «KG ГРУПП» курулуш компаниясынын президенти Имамидин Ташов демөөрчү болуп келет. Үстүбүздөгү жылдын эсебинен 500 миң сом берген болсо, келерки жылы анын үстүнө дагы 200 миң кошуп, 700 миң сом берерин айтты.

Эскерте кетсек, былтыр 714-аскер бөлүгүнө барчу жолду толугу менен жасап берген. Имамидин Ташов мындай колдоосунун себебин «Менин мекениме кызмат кылууга ант бергендерди колдоого мен да ант берем» деген сөзү менен түшүндүрдү.

Аскердик жарандык кызматташтыкты чыңдагандыгы үчүн өзгөчө кырдаалдар министри, генерал-майор Кубатбек Боронов Имамидин Ташовду медаль менен сыйлады.

Аман Алиев