Кыргыз өлкөсүнөн чыккан мушкер Валентина Шевченко менен UFC чемпиону бразилиялык Аманда Нуньес 10-сентябрда (Бишкек убактысы менен саат 10:00дө) беттешет. Көп күттүргөн аталган спорттук иш-чара “UFC-215” турниринин алкагында болуп, Канаданын Эдмонтон шаарында орун алмакчы. Аманда Нуньес учурда жеңил салмак категориясындагы чемпион. Ал бул наамга 2016-жылы америкалык Ронда Роузини жеңген соң ээ болгон. Эми бул беттеште ошол наамды коргоп калуу үчүн жан үрөшү керек болот. Ал эми кыргызстандык мушкер Валентина Шевченко Аманда Нуньестен кийинки эле орунду ээлеп турат.
Шевченко менен Нуньес буга чейинки маалымат жыйындарында алдыдагы беттеш тууралуу ойлорун айткан. Валентина Шевченко “Мен бардык жыйынтыкка даярмын. Беттештен кийин мен чемпион аталам. Мурун жеңилсем да, бул сапар жыйынтык башкача болот” деп айтты. Ал эми Аманда Нуньес “Мен жер планетасындагы мыкты мушкермин. Шевченко болсо мендей кыйынга туш келген ийгиликтүү адам. Бул мен күткөн беттеш” деген журналисттерге.
Шевченко менен Нуньестин беттеши ушул жылдын июль айында болмок, бирок беттештин башталышына бир нече саат калганда Нуньес ден соолугуна байланыштуу беттешти жылдырууга мажбур болгон.
Эскерте кетсек, Нуньес Шевченкону 2016-жылы жеңип алган.

Бектур Токтоноев
sport@super.kg