Атактуу америкалык рэп ырчысы Ники Минаж кыргыз студентине Сочи шаарында өтө турган Бүткүл дүйнөлүк жаштар жана студенттер фестивалына барганга акчалай жардам берет. Кыргызстандык студент Акжол Медербеков белгилүү ырчыдан интернет аркылуу аталган фестивалга баруу үчүн 350 доллар сураган. Акжол жогорудагы таң калычтуу аракетин мындайча түшүндүрөт: «Ники Минаж күйөрмандарын абдан жакшы көрөт. Ошон үчүн мен андан жардам сураганда баш тартып коёт деп ойлогон жокмун. Менин сураган акчамдын суммасынын аздыгы дүйнөдөгү эң бай ырчылардын бирин таң калтырды. Ал: "Макул, мен сага жардам берем, бирок мен билип алайын, сага 350 доллар керекпи же 350 миң долларбы?" дегенде, мен «350 доллар эле керек» деп жооп жаздым. Ал дароо жеке баракчама банктык эсебимдин номерин сурап жазды". Эске салсак, Бүткүл дүйнөлүк жаштар фестивалы 14-октябрдан 22-октябрга чейин Сочи шаарында өтөт. Ага 150 өлкөдөн 20 миңдей жаштар катышат.