Тарсылдаган мүнөзү бар ырчы Айпери Кубик кызынын чыгармачылыктын казанында кайнап жүргөнүнө 10 жыл болуптур. Элдин көз алдында бой жетип, турмушка узап, кайгы-капасын тең бөлүшүп отурган Айпери «адам бара-бара бышат экен, мен да өзгөрүп, акырындан бышып жатам» дейт.

– Кош келипсиң, Айпери, жакында эле Хосе деген мырза менен дуэтиң жарык көрүп, көпчүлүктүн сынына кабылды...
– Рахмат. Өзүңүздөр билесиздер, мен тарттырган ар бир клип дайыма талкуунун чордонунда калат. Анткени ар бир клибиме өзгөчө мамиле жасайм, ошол эле кан соргуч тууралуу же суунун астында тартылган клиптерим деле азыркы клибимден кем эмес талкуу болгон. Курсагымдагы төрөлө элек балам жөнүндө ырдап боюмда барда клипке тартылгам, кайненелер тууралуу тарткан клибимди эл өзгөчө кабыл алышкан. Эл сөз кылып, талкуулап жатышса, демек, мен максатыма жетиптирмин. Жакында эле дагы бир жаңылык киргизейин деп Хосе деген ырчы мырза менен «Дани» деп аталган кыргыз-испан дуэтин жаздырганбыз. Экөөбүздүн чогуу түшкөн сүрөттөрдү Инстаграм баракчама киргизип койсом, кыргыздын жигиттери мени аны менен жүргүзүп, жашатып коюшту. Эркек кишилердин тили жаман болот экен, мага чейин чалып "негр жигит менен жүрүп алыптырсың" деп урушкандар болду. Калп эле баатыр боло берген эркектерге аябай жиним келди. Хосе Кыргызстанда клубдарда ырдайт, Елена деген жубайы бар. Биз Елена аркылуу сүйлөшүп, анан дуэтти жаздырганбыз. Экөөбүздүн ортобузда чыгармачылык гана байланыш бар, анан чогуу сүрөткө түшүп койсоң, ыр жаздырсаң эле минтип ага жабыштырып, мени каргап-шилеген болбойт да.

– Мындан ары да элди талкуу жарата турган ырларың, клиптериң менен таң калтыра берейин деп жатасыңбы?
– Ошо азыр да 2-3 чыгарманын үстүнөн ойлонуп жатам «кантип ызы-чуулуу кылып жиберсем экен?» деп (күлүп). Азыр бир гана чыгармачылык менен алаксып жүрөм, башка нерсеге убакыт жок. Эртең менен баламды бала бакчага алпарам, күндүзү уктайм, кайра баламды бакчадан алып келем, аны менен ойнойм, анан түнү тойлордо ырдайм. Кудайга шүгүр, жумуштун болуп турганы жакшы. Мени ушундай жетише албай чарчап турганым кубандырат.

– Уулуң бала бакчага барып калдыбы?
– Ооба, көбүнчө атам экөөбүз бала бакчага ташыйбыз. Бирок азыр атамдын жумуштары көп болуп жетишпей жатат. Апам үй оокаттары, кышкыга салат жабуу менен колу бошобойт. Уулум Даян эс алуу күндөрү атасын (ред.: таятасын) ээрчип жүрө берет. Базарга, унаа оңдоткон жайга барса деле жанынан чыкпайт. Эртең менен «балам, тур» десем, «садик жаман» деп көзүн ачат, бала бакчага жеткиче «жаман, жаман» деп барып ыйлаган боюнча кирип кетет. Мен кийингенде эле бир жакка кетеримди билип «кетпечи» деп безилдей берет. Бирок алдап-соолап качып кетпейм. Түшүндүрүп «мен «Дани, Дани» деп ырдап акча таап келейин, анан сага шоколад алып келем» десем унчукпай түшүнгөнсүп калат.

– Учурда Кыргызстанда ажырашкандан кийин балдарын жалгыз тарбиялап калган айымдар бир топ, өзүңдүн мисалыңда аларга кандай кеңештерди берет элең?
– Чынын айтсам, мага күнүнө 20-30дай ажырашкан айымдар кеңеш сурап кайрылышат. «3 балам менен жалгыз калдым, эмне кылам, кеңешиңди берчи» деп сурашат. Ажырашкандан кийин жашоо бүтүп калбайт, улана берет. Болгону убактылуу турмуштун кыйынчылыгына чыдаш керек. Турмуштан жаңылган адам азыр ар бир үй-бүлөдө бар болуш керек. Мен ажырашкандан кийин бирөөдөн кеңеш сурамак түгүл айткандан уялгам. Мен баарынан да ата-энем үчүн эзилдим, «кызы ажырашып келди» деген сөзгө калтырдым деп ойлодум. Бирок атам «маңдайга жазганын көрөсүң, баары жакшы болот» деп сооротту, мага ата-энемдин колдоосу гана маанилүү эле. Ажырашкандан кийин бир жума жаттым, болду, өзүмдү колго алып, чыйралып баш-отум менен чыгармачылыкка киришип кеттим. Айымдар үлгү катары көрүп менден кеңеш сураганына кубанам. Эртеби, кечпи адам бара-бара бышат. Мындайда спорт эң мыкты жардамчы, спорт менен машыксаң өзүңдү жакшы көрүп каласың.

– Үй-бүлөлүү мырзаны сүйүп калсаң, баарына көз жумуп турмушка чыгат белең?
– Билесизби, ажырашкандан кийин көп мырзалар тийишип көрүшөт. Мырзаларда «ажырашкан айымдар жеңил ойлуу болот» деген түшүнүк калыптанып калганбы билбейм. Мен мурункудай жаш кыз эмесмин. Үй-бүлөлүү мырзаны өзүмө жакын жолотпойм, сүйлөгөнүнөн эле билем, болбой эле ашынып тийишип баратса кагып-силкип урушуп салам. Мындан улам мени «кызга окшоп сүйлөгөндү билбейт, абдан орой мамиле кылат» дешет экен. Мага жеңил ойлуу дегенге караганда орой деген сөз уккан артык. Жакында эле дос балам үйлөндү, дароо алыстап кеттим. Анткени анын жубайы, үй-бүлөсү бар, ар бир айым жолдошун жалгыз бой жүргөн айымдан сөзсүз кызганат.

– Сенде бой десе бой, келбет десе келбет бар, подиумга чыгып өзүңдү моделдик чөйрөдө сынагың келеби?
– Ооба, боюм узун, мен жаңы ырдап баштаганда 3 моделдик агенттиктен сунуш түшкөн. Атама айтсам «жөн эле койчу, кызым» деп койгон. Бирок ырчылыкты баштаганда деле атам каршы болгон, болбой эле көгөрүп ырдайм деп жатып ырдап чыккам, өзүм моделдик кесипке анча кызыкпасам керек.

– Шоу чөйрөдө өнөрпоздордон салык алуу боюнча талаш болуп жатат?
– Ушул маселени жаңы эле атам экөөбүз сүйлөшүп келе жаттык эле. Мен салык төлөө боюнча каршы пикирдемин. Себеби биздин тапканыбыз туруктуу эмес. Сезондордо гана той болушу мүмкүн, болбосо жок эле отуруп калабыз. Иштебей отурганда ким төлөйт? Тойдогу ставка ырчынын популярдуулугуна жараша бааланат. Мисалы, кээ бир ырчылардын аты бар, бирок тойго эч ким деле чакырбайт, алар эмне кылат? Ошондуктан бул маселе терең иликтенип талданышы керек деп ойлойм.

– Учурда ырчылардын көбү той-концерттерде жардамчылары менен жүрүп калышкан, байкасам, сен жалгыз жүрөт экенсиң.
– Ооба, көпчүлүк учурда жалгыз жүрөм. Чыгармачылыкта жүргөнүмө 10 жыл болду, мен ушул жылдарда баарына өзүм чуркап жүрүп көнүп калыптырмын. Мурун клип тартсам деле жарык берүүчү каражаттарды, камераларды көтөрүп алып эле жүрчүмүн. Менеджер менен иштешейин деп алып көрдүм, бирок көнүп калгандар кайра эле өзүмө түз чыгып жумуштарын бүтүрүп алышат, жардамчымдын жумушу жок калат экен. Анан «кой, өзүм эле кылайынчы» дедим.

– Маегиңе чоң рахмат!

Айперинин "Агым" жана "Дани" аттуу талкуу жараткан клиптери.

"Турмушта атамдын колдоосу болбосо мен мынчалык күчтүү болбойт элем".

Лунара Бекиева
star@super.kg