Окурмандардан келген суроолорго Бишкектеги "НАСА" юридикалык компаниясынын башчысы, юрист НУРБЕК АБДАЛИЕВ жооп берет.

– Үстүбүздөгү жылдын 16-августунда Бишкек шаарындагы төрөт үйүнүн биринде кесарево жолу менен төрөп, 5 күн жаттым. Үйгө чыккан 26-августтан баштап дене табым 39,5ке көтөрүлүп, алды жагымдан ириң келе баштады. 28-августта жуунайын десем жыныс кынынын оозунан колума бир нерсе урунду. Сууруп алсам тампон ордуна колдонулган узун-туурасы 7 сантиметрдей келген төрт чарчы даки экен. Сасып кетиптир, өңү карайып чирип баштаптыр. Ириң ого бетер куюла баштады. Ошентип дене табым 39дан түшпөй, 31-августта клиникалык ооруканага барсам “острый эндометрит после кесарево сечение” деген диагноз коюшуп, жаткызып дарылай башташты. Врачтар да менин “даки тампонду сыягы операция кезинде врачтар салып, ошол боюнча унутуп коюшкан” деген оюма кошулушту. Дарыланып жакшы болуп калдым.
Менин сурайын дегеним, калып кеткен тампондун айынан өмүрүмө коркунуч келди. Клиникада жок дарыларды сатып алдым. Эми ошол операция жасаган врачтарды сотко бере аламбы? Бирок баягы чириген тампонду нес абалымда ыргытып жиберген элем.

Мира, 26 жашта, Бишкек шаары

– Эгер ошол кесарево жолу менен төрөткөн врачтардын айынан ден соолугуңузга залал келсе, анда дарыланганыңызды жана сизге коюлган диагнозду тастыктай турган медициналык аныктаманы алып, дары-дармекке кеткен чыгымдардын квитанцияларын кошуп, сотко же прокуратура органына кайрылсаңыз болот. Төрөт үйүнүн башкы врачына жазуу түрүндө доо арыз менен да кайрылыңыз.

“ДОСУМДАН ЧЫГЫМДЫ ӨНДҮРҮП АЛА АЛАМБЫ?”

– Саламатсызбы? Менин машинамды дос балам айдап баратып башка машинаны сүзүп алды. Мен жанында болчумун. Эми ал бала менин да, тигинин да машинасын оңдотуп бербейм деп жатат. Эмне кылсам болот?

Алиш, 29 жашта, Бишкек шаары

– Мыйзам боюнча, эгерде жабыркаган тарап сотко доо арыз менен кайрылса, сотто машинанын ээси менен айдап бара жаткан айдоочу экөө тең жооп беришет. Сот тарабынан ушундай чечим чыккан болсо, сиз чыгымды досуңуз менен тең бөлүп төлөйсүз. Бирок кийин сотко досуңуздун үстүнөн доо арыз менен кайрылып, сизден кеткен чыгымдарды андан өндүрүп алуу мүмкүнчүлүгүңүз бар. Ал үчүн доо арызга МАИ кызматынын протоколу (протоколдо досуңуз айдап бара жатып, эрежени бузуп сүзүп алган деген факт көрсөтүлүшү керек), квитанция жана башка тастыктай турган документтерди тиркейсиз. Бирок сотко жеткирбестен досуңуз менен сүйлөшүп, эгер маселе чечилбесе, сотко кайрылууга аргасыз болоруңузду эскертип коюңуз, Балким, ойлонуп көрүп сөзгө келер.

“АЛИМЕНТТИН ӨЛЧӨМҮН КӨБӨЙТСӨ БОЛОБУ?”

– Мен экинчи топтогу майыпмын. Бир кызым бар, атасы 625 сом алимент төлөйт. Көбөйтүүгө болобу? Атасы да экинчи топтогу майып.

Зарина, 30 жашта, Бишкек шаары

– Үй-бүлө Кодексинин 124-беренесинин негизинде, сот тартибинде алименттин өлчөмү белгиленген болсо, кийин алимент төлөөчүнүн материалдык абалы өзгөрүлсө, сот кайра кайрылган тараптын арызын карап көрүп, алименттин белгиленген өлчөмүн өзгөртүүгө укуктуу. Эгерде жолдошуңуздун материалдык абалы жакшырып, тапкан айлык маянасы (же кирешеси) көбөйсө жана аны сиз сотто тастыктай алган болсоңуз, алименттин өлчөмүн көбөйтүүсү мүмкүн.

Окурман, сиз укуктук жактан коргоого муктажсызбы? Анда биздин «Адистин кеңеши» рубрикабыз кызматыңызда. Сиздин тынчыңызды алган суроолорго тажрыйбалуу мыкты адистер жооп беришет. Кат жазыңыз, кеңеш сураңыз! Суроолорду (0312) 32 33 26 номери, 0557756319 WhatsApp номери аркылуу берсеңиздер болот же kenesh@super.kg дарегине кат жазыныз.

Канымжан Усупбекова
kenesh@super.kg