Узун, кыска, жалпак, түтүкчө, спираль, үлүл, бантик, кесме түрүндө... Бул макарон азыктарына таандык мүнөздөмө. Бүгүнкү күндө ашканабыздан анын жок дегенде эки түрүн таба алабыз. Келиңиз, макарон азыктарынан түрлөп тамак жасайлы.

ПОМИДОР ШИРЕСИНДЕГИ ПЕННЕ

30 мүнөт 2 порция

Керектелүүчү азыктар:

• Пенне – 250 грамм
• Помидор – 3-4 даана
• Райкан – 1 тал
• Сарымсак – 1 тишче
• Зайтун майы – 2 аш кашык
• Майдаланган грек жаңгагы – 1 чай кашык
• Татымына жараша туз, мурч, кумшекер

Даярдоо ыкмасы:

1. Помидордун үстү жагын акырын бычак менен ачакей түрүндө тилип, кайнак сууну жаба куябыз. Бул ыкма менен кабыгын сыйрып, сабагы өскөн жерин кесебиз.
2. Помидорду, аарчылган сарымсакты жана райкандын 3-4 жалбырагын блендерге салып томат ширесин даярдайбыз.
3. Табадагы зайтун майы ысыган кезде томат ширесин куюп, майдаланган жаңгакты, татымына жараша туз, кумшекер, мурч салып боткодой коюуланганча жай отто 10 мүнөттөй кайнатабыз.
4. Соус даяр болгончо макаронду 2-3 литр туздуу сууга кайнатып бышырып сүзүп алып, суусун сарыктырабыз.
5. Бышкан макаронго томат ширесин, зайтун ашын кошуп аралаштырып койсок тамагыбыз даяр болот. Дасторконго коёрдо тамактын үстүнө сырдан себелеп, райкан жалбырагы менен кооздойбуз.
   
   
   ПАППАРДЕЛЛЕ КОЗУ КАРЫН МЕНЕН
   
   40 мүнөт 3 порция

Керектелүүчү азыктар:

• Паппарделле макарону – 270 грамм
• Козу карын (каалаган түрү) – 400 грамм
• Өсүмдүк майы – 4 аш кашык
• Каймак май – 110 грамм
• Пармезан сыры –100 грамм
• Сарымсак – 4 тишче
• Укроп – 2 тал
• Татымына жараша туз, мурч

Даярдоо ыкмасы:

1. Козу карынды тазалап, жууп, кагаз майлык менен аарчып суусун сарыктырып алабыз да, жука кылып кесебиз.
2. Сарымсакты аарчып майда туурайбыз.
3. Сырды майда тиштүү сүргүчтөн өткөрөбүз.
4. Табага майдан куюп сарымсакты кызарта кууруйбуз да, каймак майды салабыз.
5. Каймак май эриген кезде тууралган козу карынды салып, татымына жараша туз, мурч кошуп жай отто 10 мүнөттөй кайнатабыз.
6. Мискейге 2 литр сууну куюп, татымына жараша туз салып, макаронду бышырабыз да, сүзүп алабыз.
7. Макарондун суусу сарыкканда аны куурулган козу карындын үстүнө салып, сырды, майда тууралган укропту кошуп аралаштырабыз. Тамагыбыз даяр!

«КУШ УЯСЫ»

40 мүнөт 4 порция

Керектелүүчү азыктар:

• Капеллини макарону – 8 даана
• Фарш – 400 грамм
• Пияз – 1 баш
• Сыр – 150 грамм
• Жумуртка – 1 даана
• Томат пастасы – 1 аш кашык
• Каймак – 1 аш кашык
• Кумшекер – 1 аш кашык
• Өсүмдүк майы – 2 аш кашык
• Татымына жараша туз, мурч

Даярдоо ыкмасы:

1. Аарчылган пияз, сырды майда тиштүү сүргүчтөн өткөрөбүз.
2. Фаршка сүргүчтөн өткөрүлгөн пияздын жана сырдын жарымын, чийки жумуртка, татымына жараша туз, мурч кошуп аралаштырабыз.
3. Макаронду туздуу сууга 3-5 мүнөт кайнатып, формасын бузбай чыгарып алабыз да, электр мешинин табасынын ичин майлап, ага тизебиз.
4. Эми макарондун ортосун акырын ачып, эт туурамжысы менен толтурабыз.
5. Пиязды майга кууруп, 300 миллилитр сууну куябыз. Суу кайнап чыкканда каймакты, кумшекерди, татымына жараша тузду салып, жай отто 5-7 мүнөт кайнатып соус даярдайбыз.
6. Табага тизилген макарондун үстүнө ысык соусту куюп, сырдан текши себелеп, 180 градуста ысып турган электр мешине 20 мүнөткө салабыз. Бышкан тамактын үстүн буурчак менен кооздойбуз.

Италиялык ашпоздордун сыры: Макарон азыктарын бышыруучу суу туздуу жана көлөмү көп болушу шарт.

Дамира Арстанова
kenesh@super.kg