Шайлоодо бийликтин талапкеринин жеңишин камсыздоо максатында мамлекеттик машина катуу иштеди. Ал үчүн бир жыл мурун эле ыңгайсыздарды тазалоо, соттоо сыяктуу иштер башталып, шайлоо активдүү атаандаштарга күмөндүү кылмыш ишин ачуу, УКМКнын тергөө абагына камоолор менен коштолду. Мураскердин негизги атаандашы Өмүрбек Бабановго Чүй жана Токмок аймактарынан шайлоодогу үгүт иштерин жүргүзүүгө «Кыргызстан» партиясынын лидери, Жогорку Кеңештин депутаты Канатбек Исаев киришкен. Канатбек Исаев 2010-жылдардан берки Жогорку, Жергиликтүү кеңештерге болгон шайлоолордо Чүй жана Токмок аймактарында алдыңкы орунду камсыз кылып келгени белгилүү. Ал бийликтин бардык аракетин дагы да болсо басып өтүп, жеңүүчү добушун алып келди. Мына ушундан чочулоо менен Канатбек Исаев шайлоого чейин эле күч органдары тарабынан күмөндүү видеожазуунун, аудиожазуулардын шылтоосунда камакка алынды. Ага карабай Канатбек Исаев өз жоопкерчилигине алган Чүй жана Токмок аймактарында Өмүрбек Бабановго 52 пайыз добуш камсыздап, ал эми бийликтин талапкери Сооронбай Жээнбеков 34 пайыз, Чүйдүн кулуну Темир Сариев 2 пайыздык добуштарга ээ болду.
Канатбек Исаевди «мамлекетте баш аламандык, төңкөрүш уюштурууга аракет кылган» деп өзүнүн шайлоо иштерине иштеген адамдарга акча берип жаткан учурду түшүнүксүз видеого тартып алуу менен «далил» деп камакка алышты. Канатбек Исаевдин ишин ачык иликтейли деген жактоочулардын өтүнүчүн тергөөчүлөр канааттандырышкан жок. Ал видеодо деле эң негизгиси Канатбек Исаевдин оозунан баш аламандык, төңкөрүш уюштурабыз деген сөздөр дегеле чыккан эмес жана мындай аракеттерди жасоого бир дагы аракет кылган эмес. Көпчүлүк бул кылмыш ишин шайлоодо бийликти сактап калуу аракетинин натыйжасы катары кабылдоодо. Канатбек Исаев бийлик үчүн жантыгынан жата кала турган мырзалардан эмес. Эгер бийлигин сактап калган болсо, элдин чыдамын кетирбей элдик депутатты эркиндикке чыгарышат деп күтөлү.

Аман Алиев