Бул жолку каарманыбыз Роза Шакирова менен SUPER.KG порталындагы түз байланышыбыз абдан жандуу өттү. Бирде «башым ооруп кетти, көз тийди окшойт» деп тамашалап, бирде «эмне?» деп окурмандарды урушумуш этип, айтор, көрөрмандарды зериктирген жок.

– Роза эже, кандайсыз? Жиниңиз чукулдай сезилет. Ачууңуз келгенде кантип, эмнеден жиниңизди чыгарасыз?
– Бойдок кезде жиним аябай чукул болчу. Урушкум эле келе берчү. Турмушка чыккандан кийин назик болгонго аракет кылып калдым. Ачуум аябай келгенде Кудайдан сабыр тилейм. «Көнгөн адат өлгөндө калат» дегендей, кээде сыртка чыгып кетет. Бул жерде жолдошумдун тарбиясы чоң. Мени катуу кармайт.

– Жолдошуңузду кеп кылып калдыңыз. Кайсы сапаты менен сизди арбап алган?
– Ал сапаттары азыр жок. Мени менен таанышканда көп сүйлөп, жакшы сөздөрдү айтып берчү. Азыр токтоо, оор басырыктуу болуп калган, көп сүйлөбөйт.

– Ырчы болуп азыркы деңгээлге жеткенче кандай иштерде иштедиңиз? Эң эсте калганы кайсы болду?
– Баары эле эсимде, студенттик кезде көп ачка калчумун. Кафеге барып кыздар официант болуп иштешчү. Мени жумушка алышчу эмес, орусчам да жок, иштегенге шыгым да жок болчу. Барып эле идиш жууганга калчумун. Бир күнү идиш жууп жатсам тааныш эжекем издеп келиптир. Ошондо аябай намыстангам. Анткени ал кезде Ошто кайсы жерде болбосун комузумду көтөрүп барып ырдаган жылдыз элем. Андан кийин подъезд жууп жатканда классташ балдарым көрүп аябай ардангам. Ошондо почтага келип апама чалып «эмнеге мага акча салбайсыздар?» деп ыйлаган элем. Азыр ойлоп, маңдай тер менен тапкан акчама эмнеге намыстандым экен дейм.

– Ырчылардын жашоосун көрүп ырчы болуп кетсемби дей берем. Күнүнө канча тойго барасыздар? Тапкан акчаңызды эмнеге жумшайсыз?
– «Ырчылардын жашоосун бир ит, бир хан көрөт» дейт. Жаңы ырдап чыкканда машинада уктаган күндөр да баштан өткөн. Азыр кээде бир күндө 10 той болот. Ошондо алган акчамдын 3төн бирин жардам кылып берем, ыр жаздырам. Баарына маалым, үйүмдү кредитке алгам. Аны былтыр төлөп бүттүм. Кээде эч жакка баргым келбей үйдө отуруп калам. Ошентип акчалар өз ордун таап кетет.

– Турмуш курарда сүйүү менен турмушка чыктыңыз беле же жашым өтүп баратат деп кеттиңизби?
– Жолдошум менен 28 жашымда таанышкам. Жарым жылдай сүйүү сезими жок эле, байке, карындаш катары сүйлөшүп жүрдүк. 29 жашымда турмушка чыктым, анда жашым да өтүп бараткан, сүйүү да жакшынакай болуп келип калды. Бизде менин сүйүүм көбүрөөк болдубу деп ойлойм. Себеби кыз бала сүйсө жакшы жактарын көрсөткөнгө аракет кылат экен.

– Сиздин жолдошуңузду криминалдык чөйрөгө байланышы бар деп угам. Ошон үчүн ал жөнүндө көп айтпайсызбы?
– Жолдошумдун кайсы жумушта иштегенин мурун сураганда айткан эмес. Ошол боюнча сураган эмесмин. Бирок дайыма менин жанымда. Кечки саат 5ке чейин жумушта болот. 5тен түнкү 12ге чейин көчөдө жүрөбүз. Түнү менен үйдө. Анан кайсы убакта ал жакка кетип калат, билбейм (күлүп).

– Мааниси терең, музыкасы да мыкты, кийинки муундарга мурас кала турган ырларды жаздырып, аткарып чыгууга аракет кылбайсызбы?
– Учурда ырдалып жаткан ырлар замандын агымына жараша кетип жатат. Биз 80 жашка чыкканда ушул ырларды сонун деп эле баалап калабыз. Кайра кийинки муундун ырларына ичибиз чыкпай калышы мүмкүн.

– Кытайда өкмөт ырчыга кийим тиктирип берип, алар жок дегенде 3 жыл ошол өлчөмдө келбетин сактоосу тийиш экен. Кыргыздын ырчы айымдары келбетти сахнага ылайык сактоого анча аракет кылышпаганы мени таң калтырат. Сахнага ырчы катары чыгып жаткан адам үнүнө да, келбетине да, жүзүнө да кам көрүшү керек го?
– Туура, кам көрүш керек. Бирок дайыма өзүңдү карай албайсың да. Өзүн карап, бирок үй-бүлөсүн унутуп койгондор бар. Менин үй-бүлөм, туугандарым бар. Аларга да көңүл бөлүш керек. Кыргызстанда 3 жыл келбетин бир калыпта сактап жүрүү мүмкүн эмес.

– Жолдошуңуздун сиздикинен башка да балдары барбы?
– Жолдошум Нурсеит менден 7 жаш улуу. Ортобуздагы уулубуздан сырткары анын эки кыз, бир уулу бар. Атасы балдары менен катышат, мен катташпайм.

– Жолдошуңузду эмнеге ачыкка чыгарбайсыз? Сиз анын экинчи аялысызбы? Жолдошуңуз эки аялы менен тең жашайт деген чынбы?
– Мен эмнеге ачыкка чыгарбайт экенмин? Тойлордо чогуу жүрөбүз, каякка барбайын жанымда. Сөзсүз ачыкка чыгарыш үчүн күйөөңдү түз эфирге алып келип отургузуп коюш керекпи? Жолдошумдун кесиби башка. Мен жолдошумдун 2-симинби, 3-сүбү, 4, 5-си экенимди билбейм. Бирок ал мени менен жашайт.

– Мен жашоодо түбөлүк уйкуга кетүүдөн корком. Сиз эмнеден коркосуз?
– Мен өзүм аябай коркокмун. Фантазиям да күчтүү, күндүз деле үйдө жалгыз калсам ашкананын эшиги ачылып-жабылып, бирөө артымдан «Роза, Роза...» деп өтүп кеткендей сезиле берет. Кээде жолдошума кайра-кайра чала берсем, «эмне токойдо жүрөсүңбү?» деп калат. Бала кезимде катуу коркуп калган экенмин ошондуктан жалгыз калуудан корком.