Өткөн жумада Ош шаарында өткөн Максат Довранов менен Сайкал Садыбакасованын үйлөнүү тоюнан кийин ырчы Маликанын бир жигит менен бийлеп жаткан видеосу интернетке тарап, катуу талкууга алынууда. Жуманын «темасына» айланган бул видео тууралуу ырчы өз пикирин айтты.

– Малика, коомчулукта талкууланып жаткан видео тууралуу оюңду билдирип кетпесең болбос...
– Видео тууралуу айтсам, менин эжем, кесиптешим, курбум Сайкал турмушка чыкты. Мындай той дайым эле боло бербейт. Курбумдун тоюнда бийлеп, көңүл ачтым, анын эмнеси бар? Көпчүлүк бул бийди «тойдо бийлептир» деп ойлоп алышыптыр. Жалаң жаштар Максат байке менен Сайкалдын тоюндагы сейилдөөсүндө болгонбуз. Жаныбызда шоу-бизнестеги тар чөйрө, ишенимдүү адамдар болчу. Той дегенди баары эле билишет. Эс алып, ойноп-жыргайсың. Мен жашынып алып жамандык кылган жокмун. Мен кандай болсом ошондоймун, эс алганды кааладымбы, эс алдым. Мени колдогондор да бар, «эл алдында жүргөн адамдын мындай кылыгын кандай түшүнсө болот?» деп сындагандар да бар. Ырчылардын жашоосу оор. Жаман ою жок эле жүрөсүң, аягында ушундай абалга туш келип каласың.

– Тар чөйрөдө бийлесеңер, бул видеону интернетке өзүңөрдүн эле адамдар таратты да?
– Албетте, көрө албастар бар, алар жок болуп кетпейт. Жарыялагандар мени атайын элге жаман көрсөткүсү келгендир же өзүм билбей бирөөнү таарынтып алгандырмын, ошолор интернетке жүктөгөндүр. Бирок ал жерде мен эл кеп кылгандай килтейген улуу киши менен эмес, кичинекей кезден чогуу өскөн досум, классташым менен бийлегем. Биз баарыбыз жашпыз. Бул бий баттл болчу, эки жак эрегишип бийлешет. Негизи бизден башка деле көпчүлүк бийлеген болчу, алардыкы мынча чуу жараткан жок.

– «Кыз-Бурак» тобунун мурунку ырчысы Азалия Дүйшөналиева менен тойдо уруша кетишиптир деген кептер да болду. Анын канчалык чындыгы бар?
– Бирөө бирөөгө айтса эки сөз кошуп, экинчиси үчүнчүсүнө төрт сөз кошуп салышты. Чынында андай нерсе болгон эмес.

Гүлжамал Абылкасымова
star@super.kg