Ош облусуна караштуу Өзгөн районунун Кызыл-Тоо айылында кыргыздын таланттуу ырчы жигити Аваз Акимов төрөлгөн. Көчөнү чаңдата ойногон кичинекей Аваз кандай үйдө чоңойгон, ырчынын үйүндө конокто болдук.

Орозбай Калиев, Аваз Акимовдун атасы: «БАЛДАР ҮЙГӨ КЕЛГЕНДЕ БИЗДЕ МАЙРАМ. СЫНАЛГЫДАН АВАЗДЫН ЫР, КЛИПТЕРИН КӨРҮП СҮЙҮНӨБҮЗ»
– Бул үйдү менин ата-энем алып берген. Өзүмдүн акчама кошуналардан да тыйын-тыпыр кошуп чогултуп, балдарымдын бирөөсү үйрөнүп алсын деп Өзгөндөн бир орус баладан аккордеон сатып алгам. Үйгө алып келсем, апасы «чай-нан жок болуп жатса, аккордеон сатып аласың» деп чуу салган. Анда улуу балам 7-класс, Аваз 1-класс болчу. Байкеси үйрөнөт экен десем, Аваз бир-эки айдын ичинде үйрөнүп алган. Азыр балдарыбыз ар бири өздөрүнүн жумуштары менен жүрүшөт. Үйгө келип калышканда биз үчүн кадимкидей майрам. Сыналгыдан Аваздын ыр, клиптерин көрүп сүйүнөбүз.

Кадича Зулушова, апасы: «АВАЗ ҮЙ ЖУМУШТАРЫНА КЫЗЫКПАЙ, МУЗЫКА ДЕП ЭЛЕ ЧОҢОЙДУ»
– Аваз 4 бир тууган. Эжеси, байкеси, анан иниси бар. Атасы Авазга 1-класста аккордеон алып келип берсе, ал аны бат эле өздөштүрүп алган. 4-класска чейин аккордеонун көтөрүп ар кайсы иш-чараларга катышып жүрдү. Анан Сыймык Бейшекеевдин колунда тарбияланды. Мүнөзү жумшак, мектепти жакшы окуду. Бирок үй жумуштарына жалкоо болчу. Үй жумуштары, мал кароо дегенге кызыкпай, музыка деп эле чоңойду. Азыр Авазга "биринчи орунда үй-бүлө, үйлөн" деп айтып жатабыз.

Адилет Керимбек уулу
star@super.kg