Бишкек шаардык кеңешиндеги коалициялык көпчүлүк тарады. Буга коалициянын курамынан көп мандаты бар КСДПнын чыкканы себеп болду. Коалициялык көпчүлүктүн жана КСДПнын шаардык кеңештеги лидери Алмаз Кененбаев бул кадамын «пландарды ишке ашыруу үчүн коалиция жаңы форматта түзүлүшү керек" деп түшүндүрдү. Ошондой эле ал коалициялык көпчүлүктү түзүү үчүн бардык фракциялар менен сүйлөшүүгө даяр экендиктерин билдирди. Бишкек шаардык кеңешине шайлоо былтыр 11-декабрда Кыргыз Республикасынын Конституциясын өзгөртүү боюнча референдум менен бир күндө өткөн. Анда 5 партия, тагыраагы, КСДП, "Республика–Ата Журт", "Кыргызстан", "Өнүгүү-Прогресс" жана "Мекеним Кыргызстан" жеңишке жетишкен. Коалициялык көпчүлүктү болсо КСДП, "Республика–Ата Журт", "Кыргызстан" курап, "Өнүгүү" менен "Мекеним Кыргызстан" оппозицияда калган. Шаардык кеңештин төрагалыгына Өмүрбек Бабановдун фракциясы болгон «Республика–Ата Журттан» Канатбек Музуралиев шайланган эле. КСДПнын коалицияны уратуудагы максаты шаардык кеңештеги башкаруучу көпчүлүктөн Бабановдун командасын чыгаруу болгону байкалып турат. Алдыда бийликке мактоо айта баштаган Бакыт Төрөбаевдин «Өнүгүүчүлөрү» коалициялык көпчүлүккө кирип, РАЖдын депутаттары оппозицияда калышы мүмкүн.

Бектур Токтоноев
politika@supеr.kg