Силер таң атканда сөзсүз турасыңар, ээ, балдар? Ал эми аюулар кышы менен укташат. Алар күздүн акыркы күндөрүнөн жаз келгенге чейин чээнге кирип таттуу уйкуга кетишет. Анда кантип тамактанышат? Алар кышында тамак да жебейт, суу да ичпейт. Анткени кышында аюулар үчүн тамак табуу оор. Кар жер бетин жаап калгандыктан алар эч нерсе таап жей алышпайт. Бирок жайы менен тамак көп жеп өзүнө май топтошот. Ушунчалык көп тамак жешет десеңер, денесине 15 сантиметрге чейин калыңдыкта май топтолуп калат. Токой падышасы жайында күнүнө 20 миң калорияга чейин топтошот. Суук башталары менен кыштап чыгуу үчүн чээн издешет. Мурунку чээнин тапса кирип алат, болбосо жаңы казат. Чээнинин ичин жылуулап, кышка даярдык көрөт. Көп учурда кайыңдын түбүнөн казганга аракет кылышат. Уктап жатканда мүнөтүнө 5-6 жолу гана дем алат, анткени кышында организми жай иштеп калат. Ошентип алар 6-7 ай укташат.
Аюу таманын ачка болгон үчүн сорбойт, жылыныш үчүн сорот.Кызыгы, кышында кара жана күрөң аюулар гана укташат. Ак аюулар болсо кышында уктабайт. Алар жеген тамагы балык болгондуктан кышында суу ичинен балык кармап жешет.

Нуржамал Жийдебаева
balakai@super.kg