Учурда той өткөрүп, жакшылыгына ырчы-бийчи, куудулдарды чакыруу адатка айланып кетти. Той ээлери шартына карап элге белгилүүсүн, белгисизин чакырып келет. Бирок ырчылардын беделине шек келтирип, алардын ырын фонограмма менен аткарып, арзан баага макулдашып тойдо кызмат көрсөткөн окуялар катталууда. Жакында эле борбор калаадагы тойканалардын биринде эстрада ырчысы Кенже Көбөкованын ырын фонограмма менен аткарган видео социалдык тармактарга желдей тарады.

Гүланда: «ФОНОГРАММА МЕНЕН АТКАРЫП ЖАТКАН КЫЗГА АЧУУМ КЕЛИП ВИДЕОГО ТАРТЫП АЛГАМ»
Чуу жараткан видеону тартып алган ырчы Гүланда ал тойдо конок болгонун, фонограмма менен ырдаган кызды тааныбай турганын айтты.
– Биз тойго өкүл ата, өкүл апа болуп барганбыз. Башында бейтааныш кыз Азизанын аткаруусундагы «Жар-жарды» айтып, эки жашты залга киргизгенде көп маани берген эмесмин. Тойдун ортосуна келгенде Кенже Көбөкованын ырын аткарды. Ачуум келип видеого тартып жатканда ал кыз жаныма келип учурашты. Мен дароо эле «Эмнеге бирөөнүн ырын фонограмма менен аткарып жатасың, мындай кылганың туура эмес?!» десем, унчукпай кетип калды. Видеого тартып алганымдын себеби менин башымдан дал ушундай окуя өткөн. Токмок шаарында бир кыз менин үнүм менен жазылган «Жар-жарды» айтып, тойлордо кызмат кылат экен. Мага тааныштарым айтышты. Ал кызды издештирип, телефон аркылуу кардар катары байланышка чыгып «кандай «Жар-жар» айтасыңар?» деп сурасам, «Гүланданын» деди. Ошондо «бирөөнүн үнү менен «Жар-жар» айткандан уялбайсыңарбы, минусун ала бергиле, бирок өзүңөрдүн үнүңөр менен чыккыла» дегем.

Кенже Көбөкова: «МЕНИН ЫРЫМДЫ ФОНОГРАММА МЕНЕН АТКАРЫП ЧЫККАН КЫЗ КЕЧИРИМ СУРАДЫ»
Кенже Көбөкова окуядан соң социалдык тармактагы өздүк баракчасына: «Алтыным, сиңдимсиңби же курдашымсыңбы, кичине уят деген болуш керек. Менин үнүм менен ырдап жатасың. Калың эл күбө. Уятың болсо өзүң жолугарсың. Жана дагы экинчи мындай кылбайсың деп ишенем. Менден башка канча ырчынын ырын ырдап жүрөсүң ким билет? Мени издетпей эле өзү келип жолугат деп ишенем» деген билдирүүсүн калтырган. Ырчы айымга бул окуя боюнча байланышканыбызда анын кайрылуусунан кийин абал өзгөрүп, ал кыз өзү кечирим сураганын айтат.
– Социалдык баракчама билдирүү калтыргандан кийин ал кыз алдыма келип кечирим сурады. Аты Мээрим экен. Экөөбүз сүйлөшүп «Экинчи кайталаба, керек болсо сурап ал» дедим. Ал эми видео тууралуу айтсам, Мээрим тойдо «Баягыңдай күлчү кайра» деген чыгармамды аткарып жатканда ырчы Гүланда видеого тартып алыптыр. Ырдаганына каршылык жок, бирок ырдын минусун менден сурап алып, өзүнүн үнү менен жаздырып алып ырдай бербейби. Бул жерде менин үнүмдүн, эмгегимдин аркасына жашынып алып акча таап жатат. Той ээсинен 3 миң сом алыптыр. Бул – уурулук. Ырчылар фонограмма менен ырдайт деген жаман атты бизге жармаштыргандар ушулар.

Башка үн менен ырдады делген Мээрим: «КЕНЖЕ КӨБӨКОВАНЫН ЫРЛАРЫН ТОЙЛОРГО БАРГАНДА ЫРДАЧУМУН»
Видеодо улуттук кийим кийип, Кенже Көбөкованын ырын фонограмма менен аткарган Мээрим кээде той-топурларга чыгып, ырдап жүрчү экен.
– Мен Кенже Көбөкованын күйөрманымын, ырларын жактырып, ырдап жүрөм. Бирок төбөсү көрүнгөн, жалпыга таанымал сахна ырчысы эмесмин. Кээде тойлорго чакыруу болуп калганда «Жар-жар» айтып, ырдап койчумун. Ал эми башкалардын үнү менен ошол тойдо эле ырдагам. Видео жайылып кеткенден кийин Кенже эженин алдынан өтүп, кечирим сурадым. Ал мага жакшы кеңештерин айтты.

Бактыгүл Момбекова
star@super.kg