Эсиңиздерде болсо, 2013-жылы Сузак районундагы 1 жарым жаштагы Раяна аттуу кыздын мыкаачылык менен өлтүрүлгөнү 2015-жылы билинип, аны өлтүрүүгө шектүү катары өгөй атасы кармалган эле. Жакында Сузак райондук соту айыпталуучуну психиатриялык ооруканада мажбурлоо иретинде дарыланууга жөнөттү.

КЫЗЫН ӨЛТҮРГӨНҮН БИЛСЕ ДА АПАСЫ КОРКУП АЙТПАЙ ЖҮРГӨН
2015-жылдын сентябрь айында Сузак РИИБине аталган райондун жашоочусу арыз жазып, 2 жыл мурун каза болгон жээнинин өлүмүндө түшүнүксүз себептер болуп жатканын айтып кайрылган. Иш боюнча суракка наристенин апасы чакырылып, ал 2 жыл мурун ажырашып кеткен жолдошу кызынын өлүмүнө себепкер экенин айткан. Кылмышка шектүү катары 10-сентябрь күнү Кара-Чолок айылынын тургуну кармалган.
Ал кылмышты моюнга алып, төмөнкүчө көрсөтмө берген: «Окуя 2013-жылы мартта болгон. Алмагүл менен турмуш курганымда анын Раяна деген кызы бар болчу. Ал ыйлаак эле. Жаткан жерине заңдап же заара ушатып салчу. Бир күнү жумуштан келсем жуурканга сийип салгандыктан коркутуп коёюн деп күйүп жаткан мештин оозуна башын тоссом, төбө чачы күйүп, маңдай териси отко түрүлө түшкөн. Андан кийин сийдик шымы менен күйүп жаткан мешке отургуза койсом синтетика кездемеден тигилген шымы терисине жабышып кошо сыйрылып түштү. 10 күн өткөндөн кийин дагы заара ушатып салгандыктан ачуум келип сыналгынын антеннасынын зымы менен жон талаштыра тартып-тартып алдым. Дагы ыйлай бергендиктен колум менен жаакка чаптым. Ортодон 10-15 мүнөт өткөндөн кийин карасам колдору шалактап жатып калыптыр»,- деп айтып берген.
Ал эми Раянанын апасы «Мени мурдагы күйөөм «окуяны бирөөгө айтчу болсоң, кызың кантип өлсө, сени да ошондой өлтүрөм» деп коркутту. Мен анын үчүнчү аялы болчумун. Ошону менен эч кимге айткан эмесмин» деп көрсөтмө берген.

ӨГӨЙ АТА КИЙИН ПСИХИКАЛЫК ЖАКТАН ООРУЛУУ БОЛУП КАЛГАН
Жалал-Абад облустук сотунан билдиргендей, Кызыл-Жар шаарчасындагы Республикалык психиатриялык ооруканасы тарабынан жүргүзүлгөн комиссиялык соттук-психиатриялык экспертизанын 2017-жылдын 25-августундагы актысына ылайык, соттолуучу А.У.Т. кылмыш жасаган учурда өзүнүн аракеттерине жооп берип, аларды башкара алган. Ал эми учурда анын акыл-эси соо эмес, ошондуктан психикалык абалы боюнча психиатриялык ооруканада күчөтүлгөн режимде байкоо жүргүзүү менен мажбур түрүндө дарыланууга муктаж.
2017-жылдын 17-октябрында Сузак райондук соту токтом кабыл алып, ал боюнча айыпталуучунун кылмыш иши ал сакайганга чейин токтотулган. Ага карата медициналык мүнөздөгү мажбурлоо чаралары колдонулуп, Кызыл-Жардагы психиатриялык ооруканасына күчөтүлгөн тартипте байкоо жүргүзүү менен мажбур түрүндө дарыланууга жайгаштырылды. Соттолуучунун бөгөт коюу чарасы өзгөртүлбөстөн камакта бойдон калтырылып, ооруканага жеткирилгенден кийин дарылоо аяктаганга чейин бөгөт коюу чарасы өзгөртүлүп оорукананын шартындагы режимге өткөрүлүүсү көрсөтүлгөн.
Буга чейин деле айрым кылмышкерлердин психикалык жактан оорулуу боло калып, жазадан кутулуп кетип жаткандыгы тууралуу жазып келгенбиз. Бул окуя да ошол эле өңүттө бара жаткандай ойго жетелейт. Кийинки сандарыбыздын биринде бул темага дагы кайрылмакчыбыз.

Айсалкын Качкынбекова
koom@super.kg