Техника өнүккөн заманда көчөдөн айланага көз салгандарга караганда телефонуна үңүлүп, жанынан өткөн адамды жөөлөп кеткенин байкабаган адамдарды көбүрөөк учуратасың. Психологдор смартфонуна үңүлө текст терип отурган адамдарга түрдүү мүнөздөмө берип чыгышты, анда ар бирибиз өзүбүздү издеп көрөлү.

ЖАН ДҮЙНӨСҮ НАЗИК АДАМДАР
Телефонду сол колуна алып, оң колунун сөөмөйү менен тамга тергендер жан дүйнөсү назик, искусствону баалаган чыгармачыл адамдар болушат. Бейтааныш адамдарга көп ачыла бербейт, булардын ишеничине кириш үчүн көп убакыт жана далилдер керек. Эгер буларга жакпаган кадам жасап алсаңыз же олуттуу ката кетирип ишеничтен чыгып алсаңыз, дароо жакын адамдардын тизмесинен чийилесиз. Көңүлүн ооруткан адамдан кайсы бир күнү өч алышы да мүмкүн. Андыктан мындай адамдарды аз сандагы, бирок иргелген чыныгы достор курчап жүрөт. Сезимдерин көп ачыктай беришпейт, бирок болуп жаткан окуяларга чындап кубанып же кайгыра билишет.


АР ДАЙЫМ КЫЙМЫЛДАГЫ АКТИВДҮҮ АДАМДАР
Телефонду кош колдоп алып, эки бармагы менен тең тамга терип жазган адамдар көзгө көрүнүктүү, ачык, ошол эле учурда бат чыр-чатакка барган адамдар. Идеяга бай, энергиясы ашып-ташып, чечим чыгарууда түрдүү вариантта ойлоно алышат. Ойлогон идеясы колдоо таппаса маанайы түшүп, депрессияга кабылышы мүмкүн. Эгер башка бирөөнүн ою же болбосо кайсы бир эреже көңүлүнө төп келбесе, "сеники туура эмес" деп көгөрүп тура беришет. Бирок ак көңүл келишет, көңүлүн таба билген адам менен чогуу кандай иш болбосун майын чыгара аткарат. Мындай адамдарга бир орунда көпкө отуруу жакпайт, алар ар дайым кыймылда, кызыктуу жайларда, көңүл чордонунда жүрүшү керек.


ШАШМА, КЫЗУУ КАНДУУ АДАМДАР
Телефонду оң колуна кармап, оң бармагы менен тамга терген адамдар табиятынан лидер келишет. Жашоодогу максатын так коюп, ага жетүү үчүн бар күчүн жумшашат. Шашма, кызуу кандуу мүнөзгө ээ. Майда-чүйдө иштерге, ызы-чууларга аралашканды жаман көрүшөт. Бирок жакын адамдарынын маселесине баш-оту менен киришип, өзү зыян тартып калса да ошол адамды коргоого аягына чейин аракет кылышат. Иштин майын чыгара иштеп, кайсы тараптан пайда келерин алдын ала сезе билген көрөгөчтүк жөндөмдүүлүккө ээ. Бул сапатынан улам жетекчиликтен колдоо таап же көпчүлүк учурда өзү жетекчилик кызматта болот. Бирок беттеген максатына жетүүдө бут тоскон адамды тууган же башка экенине карабай тебелеп өтүп кетиши мүмкүн.


ЖАЙДАРЫ МҮНӨЗҮНӨН УЛАМ КӨП АЛДАНЫШАТ
Телефонду кош колдоп алып, оң бармагы менен тамга тергендерди психологдор позитивдүүлүгү менен башкалар үчүн жабык турган эшикти да ача алган адамдар деп сыпатташат. Жалгыздыктан жаа бою качып, өзүнөн да айланасындагылардын кызыкчылыгын жогору койгонго даяр келишет. Үйдө камалып жатса чүнчүп кетишет, андыктан иштейм, окуйм же досторум менен жолугат элем десе каршы болбой колдоп коюу керек. Бейтааныш адамдар менен бат тил табышат, мындай адамдардын тегерегинде дайыма топурап көп адам жүрөт. Бирок алардын кимиси дос, кимиси кас экенин талдап отургусу келбей, келген келет, кеткен кетет деп кол шилтеп коюшат. Баары жакшы болот дей берип, айрым учурда алданып калып бармак тиштеген учурлары да болбой койбойт.


ЭРКИНДИКТИ БААЛАШАТ
Телефонду сол колуна алып, сол бармагы менен текст терген адамдар эркиндикти биринчи орунга коюшат. Жумушта болобу, жеке мамиледеби үстүнөн көзөмөлдөөнү, ар бир кадамына отчёт берүүнү жактырышпайт. Бирок өзүлөрү жетекчилик кызматка келсе, кол алдындагыларга талапты катуу коё билишет. Баскан-турганы, кийинүү стили башкалардан өзгөчөлөнүп туруусун жактырышат. Өзүнө карата айтылган сындарды кабыл алгысы келбейт, “мени эч ким түшүнбөйт” деп ойлошот. Жанындагыларга эмес, көпчүлүк учурда өзүнө гана ишенген адамдар. Эгер анын ишеничине кире алсаңыз, достукту бекем сактай алышат. Кандай компанияда болбосун шайыр отурат, тамашакөй келишет, андыктан мындай адамдар барда кече көңүлсүз өтөт деп кабатыр болбой эле коюңуз.

Асыл Орозбекова
kenesh@super.kg