Бишкектин жылуулук электр борборундагы (ЖЭБ) авариянын келип чыгуу себептерин иликтөө үчүн түзүлгөн мекемелер аралык комиссия ишинин алдын ала жыйынтыгын жарыялады. Ага ылайык, ЖЭБдеги аварияга «Электр станциялары» ишканасы менен ЖЭБдин жооптуу кызмат адамдарынын одоно эреже бузуулары себеп болгону айтылды. Комиссиянын маалымдашынча, тийиштүү кызматкерлер суу кампаларындагы тузсуз суунун көлөмүн жетекчилердин уруксатысыз кескин түрдө азайтып жиберген. Мындан улам жабдуулар иштен чыга баштаган. 24-январда суу адаттагыдан 1,5 эсе көп колдонулуп, имараттагы сууктан улам анын көлөмүн өлчөөчү жабдыктар тоңуп, насостор иштебей калган. «Тийиштүү кызматкер жабдуулардагы мүчүлүштүктү өз убагында аныктай алган эмес. Авариялык кырдаалда ар бир цехтин кызматкери өз алдынча иштеп, ишти жалпы координациялоо жүргүзүлгөн эмес»,- деп айтылат комиссиянын жыйынтыгында.
Ошентип, ЖЭБдеги аварияга бир нече жагдай себеп болгон: маселени жөнгө салууда кызматкерлер бирдиктүү аракет жасабаганы, керектүү суунун аздыгы, имараттардын күз-кыш мезгилдерине даярдалбаганы жана башкалар.
Эске салсак, 26-январда ЖЭБде авария болуп, Бишкек шаары 5 күн жылуулуксуз калган. Буга байланыштуу Башкы прокуратура «шалаакылык» беренеси боюнча кылмыш ишин козгоп, ЖЭБдин директору Нурлан Өмүркул уулу иштен алынды.
Кытайдан карызга алынган 386 миллион долларга ЖЭБ жаңыланып, 2017-жылы пайдаланууга берилген эле. 386 миллион доллар натыйжасыз пайдаланылганы айтылып жатат. Акча кантип жумшалганын учурда Жогорку Кеңештин депутаттык комиссиясы иликтөөдө.

Бектур Токтоноев
politika@super.kg