Айгерим Расул кызы: «ЖОЛДОШУМ ӨЗҮНӨ ЖАККАН АТЫР БЕЛЕК КЫЛЫП, ШААР КЫДЫРТЫП КЕЛДИ»
– Негизи 14-февралды сүйүшкөндөрдүн күнү деп бойдок кезде башкача бир толкундануу менен тосот эмеспизби. Ал эми үй-бүлөлүү болгондон кийин бул күндү мурункудай белгилебей калат экенсиң. Балким, баалуулуктар деле жыл өткөн сайын өзгөрөт окшойт. Мурун 300 роза берсе, азыр 1 даана гүлгө деле ыраазымын. 14-февраль күнү жолдошум атыр белек кылды. Анан бул майрам гүлсүз өтпөсө керек. Жолдошум берген гүлдү кучактап алып шаар кыдырып сейилдеп келдик. Ал эми өзүм ага кеңсесине керектүү буюмдар топтомун берип куттуктадым.

Асема: «АЛТЫН ШАКЕК БЕЛЕККЕ АЛДЫМ»
– 14-февраль расмий түрдө майрам болуп эсептелбейт экен да. Ал күнү жолдошум жумушта болуп түшкү тамактанууда жолугуп бири-бирибизге камдап койгон белектерибизди бердик. Жолдошум мага негизи майрамдарда көбүнчө алтын асем буюмдарын белекке бергенди жакшы көрөт. Алтын жакшы экен да, сатсаң акча, мураска калтырсаң да болот, эскирбейт, айтор, баалуулугу жоголбойт. Өзүм да алтынга жакынмын. Майрамга деп шакекти өзүм барып тандап алдым. Ал эми өзүм жолдошума сонун «интимный» белек бердим, аны айтканга болбойт (күлүп).

Бактыгүл Бадыева: «МАЙРАМГА ЖОЛДОШУМ ЧУРКООЧУ СПОРТТУК ШАЙМАН БЕЛЕК КЫЛДЫ»
– 14-февраль – Сүйүшкөндөр күнүн биз да өзгөчө өткөргөнгө аракет кылдык. Жолдошумдун ата-энеси бизге жакын жашагандыктан, кыздарыбызды чоң ата, чоң энесиникине жиберип, өзүбүз шам жагып романтикалык кеч уюштурганбыз. Жолдошум мага үй шартында чуркап, машыкканга чуркоочу спорттук шайман белек кылды. Мурун деле мындай шайманым бар болчу, бирок ал бир аз эскирип калган эле. Жаңысы бир топ заманбап экен. Өзүм болсо жолдошум китеп жакшы көргөндүктөн, жакшы китеп белек кылдым.

Назбек Кенчинбаев: «НУРАЙЫМГА КОМУЗ БЕЛЕК КЫЛДЫМ»
– 14-февралда биз чакан концерт бергенбиз. Нурайым экөөбүз ошол концертте майрамды эл менен чогуу тостук. Чоң атама атайын комуз чаптырган элем, ошол комузду белекке бердим. Ал эми Нурайым мага унаама керектүү буюмдарды алып берди.

star@super.kg