Концерт өткөн күндөр – 19-20-21-22-23-февраль
Өткөн жери – Кыргыз улуттук филармониясы
Башталышы – 18:55 (25 мүнөт кечикти)
Көрүүчүлөр – Залдын 95 пайызы (21-февраль)
Алпаруучу – «Беш тапан» тобунун куудулу Союзбек Сейитказиев
Билет баасы – 500-600 сом
Мыкты номер – «Лейлектик кызга»

Кыргыз Республикасынын Эмгек сиңирген артисти Гүлжигит Сатыбеков жеке концертин берет дегенди угуп алып үйдө отура албастан филармонияны көздөй жөнөдүм. «Гүлжигиттин ырлары жеңил-желпи, «Чоңойгондо Жип болом», «Ана Москва, мына Москва», «Жүгөрүнү мака дейт» деген ырлар кантип болсун?» деп айрым өздөрүн укмуш сезген ырчылар мурдун чүйрүп айтып калышат. Бирок анын ырларына «сугарылгандарды», анын ырларынан өзүнүн тагдырын көрүп таасирленгендерди да көп көрөм. Филармония толуптур. Бул ошол өзүн укмуш сезген ырчыларга Гүлжигиттен татыктуу жооп. Анткени Эл артисттер деле жылдап жеке концертин өткөрө албай жүрүшпөйбү. Сатыбеков жыл сайын 5-6 күндөп зал толтура эл менен концерт коёт.
Сахнанын үч тарабына коюлган чоң экрандардан башка өзгөчөлүк көзүмө урунган жок. Аңгыча жарыктар жалп өчүп сахнадагы чоң экрандар жанып, Гүлжигит «Беш тапандын» балдары менен сахнага чыга келди. Алар «Ассалому алейкум, күйөрман» деп ырдап келгендери жибитип алайын дешти көрүнөт, ушундай ыр менен көшөгөнү ачышты. «Кыкемдер» көнгөндөй концерт «жарым эле саатка» кечигип башталды, Гүлжигиттен өтүп көрүүчүлөр кечигип концерт ортолоп калганча сырттан чууруп кирип жатышты.
Андан кийин сахнада жалгыз калган Гүлжигит оркестрдин коштоосунда жандуу үн менен жаңы ырларын ырдады эле көрүүчүлөр ооздоруна момпосуй салгандай тынч гана отуруп беришти. Көрүүчүлөрдүн жакшылап кол чаап коюусун сахнага чыккандар өздөрү суранып жатышты. Андан соң жигиттин гүлү аккордеонун алып чыгып көрөрмандары суранган ырларды аткарды эле эл жандана түштү.
Ортодо куудулдар Максат Тасмаев, Санжар Бердибеков, Жакут Сыдыков жана башкалар элдин маанайын көтөргөнгө жарашты. Алпаруучу Союзбек Сейитказиев «Мени Соке деп чакырышат. Азыр Сокелердин заманы да» деп тамашалап элдин эсинде калды.
Белгилүү куудул маркум Манас Бердибековдун уулу Санжар Бердибеков сахнада элге кумшекер менен мурчту аралаштырып бергендей эле болду. Алгач тамаша айтып элди күлдүрүп туруп, артынан атасына арнап ыр ырдап, угармандарын жашытты.
Башталгандан тарта «Исфананы» суранып отургандар эң акырында гана бул ырды уга алышты. «Убактыбыз бүтүп калды, концертти токтотушубуз керек» дегенине карабай эл кетпей, ырчыны дагы эки ыр ырдатышты. Саат 22:00дөн өтүп калганда концерт аяктап, эл менен кошо эшикке чыгып баратып, «жанагы жетимдер жарды, ээ» деп кудуңдап бараткан жигитти көрүп концерт максатына жетиптир деп мен да жылмайган бойдон үйдү көздөй жөнөдүм.

Толик сынчы

star@super.kg